96. Алгъалакъ – Къан кесек

1.

Джаратхан Раббинги аты бла окъуб башла! (Мухаммад Къуранны).

2.

Инсанны уюгъан къан кесекден джаратхан. (Ананы хатхусунда джабышгъан суу
кесекчикден джаратхан).

3.

Окъу (айт), сени Раббинг бек чомартды.

4.

Ол (адамны) къалам бла джазаргъа юретген,

5.

аны (ары дери) хапары болмагъан затха (Къураннга) юретген.

6.

Огъай алай тюлдю! Ишексиз, ол адам тамам чекден чыгъады, (Бу хапар Абу –
джахилни юсюнденди. Ол Мухаммадны Кябада намаз къылыб кёрсем, мен аны таш бла
уруб башын эзерме дегенди),

7.

ол кесин керексизге санамакъ бла (бай болуб – уллулукъгъа кетиб).

8.

Ишексиз, къайытыу Раббинги аллынады.

9.

Ол (намазгъа) чырмау болгъан адамны кёрдюнгмю сен, (Абу-джахилни)

10.

бизни къулубуз (Мухаммад Кябада) намаз къылгъан заманда.

11.

Кёлюнге къалай келеди, ол (Мухаммад) тюз джолда эсе уа.

12.

Неуа ол, Аллахдан къоркъмакъгъа чакъыра эсе уа?

13.

Ол да (Абу Джахил) хакъны ётюрюк этиб, анга чарлай эсе уа.

14.

Сора ол, Аллах къараб тургъанын билмеймиди?

15.

Огъай, ол умут этгенча тюлдю! Тохтамаса (Мухаммаддан), Биз аны кекелинден сюйреб
келтирибиз,

16.

ётюрюкчю, терсейген кекелинден –

17.

сора чакъырсын, ол джыйынын!

18.

Биз да джаханимни сакълауулларын чакъырыбыз!

19.

Огъай, алай тюлдю! Сен анга, чыртда, бойсунма, (Мухаммад). Аллахха да табын
(намаз эт), Анга джууукълашыргъа да кюреш, (анга тынгыламай).