1. |
Ала (меккачыла) бир-бирине нени юсюнден сорушадыла? |
2. |
Ол а уллу хапарны юсюнденди, |
3. |
ол ала даулашыб – тартышыб тургъан. |
4. |
Огъай, алай тюлдю! Ала аны артда билирле, |
5. |
энтда огъай, алай тюлдю! Артда билирле ала. |
6. |
Биз джерни тёшек этиб аланы тюблерине салмадыкъмы? |
7. |
Тауланы да къазыкъла этиб; (джерни бегитиб тургъан). |
8. |
сизни да нёгер-нёгер (пара – пара) джаратыб, |
9. |
джукъуну да сизге тынчаймакъ этиб, |
10. |
кечени да сизге джабыу этиб, |
11. |
кюндюзню да сизге джашау этиб, |
12. |
башыгъызда джети деменнгили (кёклени) да ишлеб, |
13. |
(башыгъызда) къызыб тургъан бир чыракъны да этиб, |
14. |
булутладан сыгъылыб чыкъгъан сууну да эндириб, |
15. |
аны бла Биз сизге битдирир ючюн; мюрзеуню, битимни, |
16. |
къалын кёгет терекле да. |
17. |
Ишексиз, (аман – иги) айырылгъан кюнню болджалы салыныбды. |
18. |
Сургъа юфгюрюлюб, сиз да джоппу-джоппу келир кюн. |
19. |
Кёк да ачылыб эшикле (тешиклеча) болуб къалгъан кюн |
20. |
Таула да джюрютюлюб букъу чарс болуб къалгъан (кюн). |
21. |
Ишексиз, джаханим да мараб (сакълаб) турады. |
22. |
Чекден чыкъгъанланы ары барырларын. |
23. |
Анда ала ёмюрлени турурла. |
24. |
Ала анда (сусабларын къандырырлай), не бир салкъынлыкъ, не бир ичерик табмазла, |
25. |
къуру, къайнар суу бла ирин болмаса, |
26. |
ол аланы этгенлерине кёре хакъларыды, |
27. |
Ишексиз, ала ишлери эсеблениуге ышанмадыла (сорургъа). |
28. |
Бизни аятларыбызны да ётюрюкге санадыла. |
29. |
Биз а хар нени да тергеб, китаб этиб турабыз. |
30. |
Сора алагъа: “Чегигиз, (энди азабны), Биз сизге къуру, азабдан башха джукъ къошарыкъ тюлбюз”, – дербиз |
31. |
Ишексиз, Аллахдан къоркъгъанлагъа уа ол кюн, хорлам барды, |
32. |
кёгет терекле, джюзюм бачхала, |
33. |
тёгерек ёшюнлю, тенг къызла, |
34. |
толу ички аякъла, (ички анда халалды), |
35. |
ала анда не терс сёз, не ётюрюк эшитмезле. |
36. |
(Ол затла) эсеблениб Раббингден сеннге хакъгъа, |
37. |
кёклени, джерни да, экисини арасындагъыланы да, Иеси Рахмандан болуб. (Алайда) Анга бир киши джукъ айталмаз. |
38. |
Ол кюн сыйлы джан да (Джабраил), мёлекле да саф -саф болуб тизилирле. Къуру Рахман Аллах эркинлик берген адам болмаса, киши сёлешалмаз. Сёлешген да, къуру тюзню айтыр. |
39. |
Ишексиз, ол кюн, келлик кюндю, Раббисине къайытыр акъылы болгъаннга. |
40. |
Биз сизни джууукълашыб келе тургъан азабдан сакълыкъгъа чакъырдыкъ. Хар адам этген затына къараб кёрюб (аман, иги этгенин), сора кяфыр а: “Ай, анасыны, мен топуракъ болуб къалсам эди!” – деб, айтхан кюн. (Гюнахларын кёрюб, отда кюймез ючюн). |