1. |
Мен ант этеме бир-бири ызындан тохтаусуз баргъан джелле бла. |
2. |
Къаты ургъан джелле бла да. |
3. |
Сюрюб булутланы джайгъан джелле бла да. |
4. |
(Керти бла ётюрюкню) айырыучу аятла бла да. |
5. |
Аманатны джетишдириучю (мёлекле) бла да, |
6. |
не кечер ючюн (тюзлени), не къоркъутур ючюн (терслени). |
7. |
Ол сизге сёз берилген, амалсыз келир (къыямат кюн), |
8. |
(аны келири): джулдузла джукълансала, |
9. |
кёк да джарылса, |
10. |
таула да букъу – чукъу болуб чачылсала, |
11. |
Файгъамбарланы да чакълары (заманнлары) джетсе, |
12. |
болджал салыныб тургъан кюннге, |
13. |
(адамла) айырылгъан кюн. (Иги – аман, терс – тюз). |
14. |
Айырылгъан кюн деген, ол не болгъанын сеннге ким билдирир? |
15. |
Ол кюн а, аны ётюрюк этиучюлеге къыйынлыкъ. |
16. |
Биз буруннгуланы тюб этмедикми сора? |
17. |
Аланы ызларындан артдагъыланы да? |
18. |
Чекден ётгенлеге, Бизни этиуюбюз алайды. |
19. |
Ётюрюк этиучюлеге ол кюн къыйынлыкъ. |
20. |
Биз сизни сыйсыз суу (кесекден) джаратмадыкъмы сора? |
21. |
аны бек джерде (ананы къарнында) этмедикми? |
22. |
Бир белгили болджалгъа дери? |
23. |
Биз анга марда (болджал) салдыкъ да (9 ай). (Къара) Биз къаллай ашхы марда салыучубуз. |
24. |
Ётюрюкге санагъанлагъа уа, ол кюн къыйынлыкъ. |
25. |
Джерни да, Биз хар затны тартыб, юсюне джыйыб – къысыб турурча этмедикми? (Алай болмаса, джер юсюнде джукъ тохтамай, ёрге кёлтюрюлюб кетер эди). |
26. |
Джашарлай, ёлюрлей (аны юсюнде). |
27. |
Анда (аны юсюнде) мийик таула да къураб, сизге да тузсуз сууну ичирмедикми сора? |
28. |
Ётюрюк этиучюлеге, ол кюн къыйынлыкъ. |
29. |
Алагъа: “Ол ётюрюк этиучюгюзге барыгъыз энди”, – дерле, |
30. |
(тютюню) юч бёлюмлю салкъыннга (джаханимге). |
31. |
Ол не салкъынлыкъ этмеген, неда отдан къутхармагъан. |
32. |
Къаланы окъла бла ургъан кибик, кёсёуле бла ургъан отха. |
33. |
(Ол кёсёуле) сары тюелеча (сейир тукъум джылтыраб). |
34. |
Ётюрюк этиучюлеге ол кюн къыйынлыкъ. |
35. |
Ол а аланы бири да сёлашалмагъан кюндю. |
36. |
Сылтауларын айтыргъа да мадарлары болмаган. |
37. |
Ётюрюкге санаучулагъа ол кюн къыйынлыкъ. |
38. |
Алагъа: “Бу терс-тюз айырылгъан, Биз сизни да, буруннгуланы да джыйгъан кюндю, |
39. |
(дуниядача) хыйла этер мадарыгъыз бар эсе, этигиз (къарамай)”, – деб айтылыр. |
40. |
Ол кюн, ётюрюкге санагъанлагъа къыйынлыкъ. |
41. |
Ишексиз, Аллахдан къоркъгъанла уа, (джаннет тереклени) кёлеккелеринде, баргъан сууланы арасында болурла, |
42. |
сайлагъан кёгетлерине да эркин. |
43. |
Сора алагъа: “Этген ишлеригиз ючюн ашагъыз, ичигиз, бу сизге огъур болсун”, – деб, айтылыр. |
44. |
Ишексиз, ашхылагъа Бизни джал беририбиз алайды. |
45. |
Ётюрюк этиучюлеге уа ол кюн къыйынлыкъ. |
46. |
(Эй, иймансызла!) бир кесек ашагъыз, (ичигиз) зауукъланыгъыз (бу дунияда), сиз чекден чыкъгъан къауумсуз. |
47. |
Ётюрюк этиучюлеге ол кюн къыйынлыкъ. |
48. |
Алагъа: “Аллахха ийилигиз”, – деб айтылса ол кюн, ийилалмазла. (Ала дунияда ийилмегенлери ючюн). |
49. |
Ётюрюк этиучюлеге ол кюн къыйынлыкъ. |
50. |
Бу айтыугъа (Къураннга) ийнанмагъан а, башха неге ийнаныр. |