1. |
(Бурун), адам улу эсгерилирлей, бир джугъу да болмай, (аты – чуу да айтылмай) тургъан заман болмадымы сора? |
2. |
Ишексиз, Биз адам улуну бир-бирине къатышхан суу кесекден джаратдыкъ, аны сынар ючюн, къулакъ, кёз да бердик. |
3. |
Биз анга тюз джолну да кёгюзтдюк (китаб ийиб). Сюйсе шукур этсин, сюйсе кяфыр болсун, (сайлау аныкъыды). |
4. |
Кяфыр болгъанлагъа уа, ишексиз, Биз сынджырла, бугъоула, къызгъан от хазырлаббыз. |
5. |
Ишексиз, ашхыла (джаннетде) аякъла бла камфара къатышхан (джаннет) сууланы ичерле, |
6. |
ол Аллахны къуллары ичерге къуралгъан, уруб чыкъгъан къара сууду. |
7. |
Сёзлерине толу болгъан (Аллахха, адамгъа да), къыйынлыгъы узакъгъа джетишген кюнден да къоркъгъанлагъа. |
8. |
Кеслерини кёзлерин къыйдырыб, мискиннге, ёксюзге, джесирге да аш ашатханлагъа. |
9. |
(Былай айтыб): “Биз, къуру Аллах разылыгъы ючюн ашатабыз, аны ючюн сизден, не хакъ, не бюсюреу излемейбиз. (Керти садакъа аллайды). |
10. |
Ишексиз, биз Раббибизден, мыдахлыкъ басхан къыйын кюнден къоркъуб (ашатабыз)”, – деб. |
11. |
Аллах да аланы, ол кюнню къыйынлыгъындан сакълаб джарыкъ, къууанч бетли этди. |
12. |
Ала сабырлыкъ этгенлери ючюн джаннет бла, дарий кийимле бла хакъ берди. |
13. |
Ала анда (джаннетде) таянчакъ орунлагъа таяныб, не иссилик, не сууукълукъ кёрмей (рахат халда). |
14. |
Кёлеккелери ийилиб, кёгетлери да алаша тюшген терекле тюбюнде. |
15. |
Алагъа кюмюш аякъла бла, чын (джылтырауукъ) стаканла бла тёгереклерине айланырла. |
16. |
Мардалы толгъан, (кюмюшден къара сауут салыннган) хрусталь аякъла бла (джаннет сууланы) ичирирле. |
17. |
(Аны кибик) алагъа анда, занджабил бла (имбир бла) къатышхан суусаб аякъла ичирирле, |
18. |
аты Салсабил болгъан къара суудан. |
19. |
Хаманда бирча тургъан джашчыкъла аланы тёгереклерине айланырла. Сен аланы кёрсенг, джайылгъан инджиле деб, алай хыйсаб этерсе. |
20. |
Сен ары (джаннетге) къарасанг а; мамырлыкъ да, уллу патчахлыкъ да кёрюрсе. (учу-къыйыры болмагъан байлыкъ). |
21. |
Аланы кийимлери джашил атлесден, парчадан болур, кюмюш бууунлукъла бла джасаныб. Раббийлери да алагъа таза ичкиле ичирир. |
22. |
“Ишексиз, ма бу (сыйлылыкъ) сизни джалыгъызды, талпыб (дыгъалас этиб) кюрешген затыгъыз да бюсюреулю болду”, – деб айтылыр. |
23. |
Ишексиз, Биз сеннге бу Къуранны бёлюм-бёлюм тюшюрдюк. |
24. |
Энди Раббинги оноууна сабырлы тур. Аладан (Аллахха) не терсине баргъаннга, не къаршчыгъа бойсунма. |
25. |
Эртден, ингир Раббинги (унутмай) эсгере тур, |
26. |
кечени бир кёзюуунде да. Анга баш уруб табын, кечени узунуна махтаула да эт. (Ол кёзюуледе намаз къыл). |
27. |
Ишексиз была уа (кяфырла) терк бошалгъанны (дунияны) сюедиле, ауур кюнню уа артларында къоядыла. |
28. |
Биз аланы джаратхан да этдик, санларын да къатдырдыкъ. Сюйсек, Биз аланы ауушдуруб, аланы орунларына, башхаланы да келтиралырбыз. |
29. |
Ишексиз, Аллахха элтген джолну тутаргъа излегеннге, ма бу насихатды (аууазды). |
30. |
Алай а сиз тыйыншлы кёрген зат, Аллах аны тыйыншлы кёрмесе, болмаз. Ишексиз, Аллах алимди, хакимди. |
31. |
Тыйыншлы кёргенин рахматына кийиреди. Залимлеге уа термилтген азабны хазырлабды. |