74. Алмуддассир – Чулгъаннган

1.

Эй, чырмалыб джатхан! (кийимлерине).

2.

Тур да ауаз айтыб тебре.

3.

Раббинги да уллула.

4.

Кийимлеринги да тазала.

5.

Кирден да кенг къач (идолладан).

6.

(Ызына) кёбюрек алыр умут бла хатер этме.

7.

(Инджиуге да) Раббинг ючюн сабырлыкъ эт.

8.

Сора сур (труба) бла (къаты) къычырылгъан заманда,

9.

ол кюн а, ауур кюн болур,

10.

кяфырлагъа ол тынч кюн болмаз.

11.

(Мухаммад), Мен джангызлай джаратханны, аны Меннге къой да олтур.

12.

ол Мен анга эркин байлыкъ бергенни,

13.

биргесине джашла да,

14.

Мен аны тюбюне (дуния байлыкъны) да джайыб салгъанны.

15.

Дагъыда ол Мени къошарыма термилиб тургъан.

16.

Огъай, алай тюлдю! Ол Бизни аятларыбызгъа къарышыбды.

17.

Узаймай, Мен анга ёрге чыгъыуну кёгюзтюрме. (Джаханим отда ёрге чыгъа да энишге
тюше турур).

18.

Ишексиз, ол сагъыш этиб план салды.

19.

Ёлсюн алай! Ол къаллай план салады.

20.

Энтда бир ёлсюн алай! Ол къаллай план салады.

21.

Сора ол (тёгерегине) къарады да,

22.

эрши къаралды, тюйюлдю,

23.

сора ёхтем ары бурулду да

24.

ол: “Бу (Къуран) юретилген хыйныдан башха зат тюлдю,

25.

ол адам сёзден башха зат тюлдю”, – деди.

26.

Мен аны артда сакъар (джаханимде) кюйдюрюме.

27.

Ол сакъар деген а неди, аны сеннге ким билдирир?

28.

Ол (адамны) не къалдырмайды, не къоймайды.

29.

Ол адамланы терилерин кюйдюреди (тюбюне дери).

30.

Аны юсюнде онтогъуз (ишчи мёлек барды).

31.

Биз, джаханимни сакълауулларын, къуру мёлекле этгенбиз. Аланы санларын а кяфыр
къауумгъа, къуру фитна (сынар ючюн) этгенбиз, китаб ахлула да ажымсыз болур
ючюн, ийманлары болгъанлагъа да ийман къошулур ючюн. Китаб иелери бла муъминле
да ишекликлери къалмаз ючюн, джюреклеринде ауруулары болгъанла бла кяфырла да:
“Бу юлгю бла Аллах не мурат этеди”, – дер ючюн. Аллах, терсейтирге сюйгенин алай
терсейтеди, тюзетирге сюйгенин да ма алай тюзетеди. Сени Раббинги аскерини санын
а, Ол кеси болмаса, киши билмейди. Бу уа (Къуран) адам улугъа къуру ауазды.
(Кяфырла, Аллах джаханимни сакълауулларыны санын онтогъуз нек этгенди дегендиле,
ол аят аны юсюнден эди).

32.

Огъай алай тюлдю! Мен ант этеме: ай бла да,

33.

айланыб кетиб баргъан кече бла да,

34.

джарыб келген тангны эртденбласы бла да,

35.

ишексиз, ол (Сакъар) – уллу (отланы) бириди,

36.

бу (Къуран) адам улуну сакълыкъгъа чакъыргъан (ауазды),

37.

сизден аллына барыргъа, артха къалыргъа сюйгеннге да (тюзелирге, терсейирге
сюйгеннге да).

38.

Хар бир джан кесини этген ишине джюкге берилибди, (хакъ алыры этгенине кёреди).

39.

алай а онг иелеринден ёзге, (онгуна – тюзюне баргъанла тюйюл),

40.

ала уа джаннетледе бир-бирине:

41.

“Ол ассыла (бюгюн) не болдула экен?” – деб, сорурла,

42.

(сора ары бурулуб аланы кёрюб): “Бу Сакъаргъа сиз не ючюн кирдигиз?” – дерле.

43.

Ала да: “Биз намаз этиучюледен болмадыкъ,

44.

неда, мискиннге джукъ ашатмадыкъ,

45.

сандракъ сёзлеге батханла бла, ары батыб турдукъ,

46.

сюд кюнню да ётюрюкге санаб,

47.

бизге ёлюм келиб ажымсыз болгъунчу дери”, – дерле.

48.

Энди (бюгюн) шафагъатчыладан алагъа хайыр джокъ.

49.

Алагъа не болгъанды сора? Эсгермеден (ауаздан) нек джанлайдыла,

50.

юркген эшекле

51.

асландан къачхан кибик.

52.

(Артда уа) аланы хар бири (сууаб) китабы джайылыб аллына келирин кюсер.

53.

Огъай, алай (ала умут этгенча) болмаз! Ала ахыратдан къоркъмайдыла.

54.

Огъай, алай тюлдю! Ишексиз, бу (Къуран) эсгермеди (ауазды).

55.

Аны эсине алыргъа сюйгеннге

56.

Алай а, къуру Аллах тыйыншлы кёрген адам (Аллахдан къоркъгъан) болмаса,
эсгералмаз аны (Къуранны). Ол (Аллах) а Андан къоркъаргъа тыйыншлы, кечмекликни
да Иесиди.