|
1. |
Ишексиз, Биз (бурун) Нухну: “Халкъынга термилтген азаб келгинчи, аланы ауаз айтыб (терс джолдан) тый”, – деб, джиберген эдик. |
|
2. |
Ол алагъа: “Эй, халкъым! Ишексиз, мен сизге ачыкъ ауазчыма, |
|
3. |
къуру бир Аллахха къуллукъ этигиз, Андан къоркъугъуз, меннге да бойсунугъуз, |
|
4. |
(ол заманда), Ол сизни гюнахларыгъызны да кечер, белгили кюннге дери, арт болджалгъа да къояр. Аллахны болджалы келген заманда, ол артха созулмаз, ангыласагъыз”, – деген эди. |
|
5. |
Сора ала аны сан этмегенлеринде Нух: “Эй, Раббим! Ишексиз, мен халкъымы кече да, кюн да чакъырдым. |
|
6. |
Мени чакъырыуум а алагъа, къуру къачмакъдан башха зат къошмады. |
|
7. |
Мен аланы Сени кечмеклигинге чакъыргъаным сайын, ала бармакъларын къулакъларына салдыла, кийимлери бла башларын да джабдыла, ёхтемле болуб бегиб тохтадыла. |
|
8. |
Мен аланы ачыкъ чакъырыб да кёрдюм. |
|
9. |
Туура да (кычырыб), ташатын (бирем – бирем) да кёрдюм. |
|
10. |
Мен алагъа: “Раббигизден кечмеклик тилегиз! Ишексиз, Ол бек кечиучюдю”, – деб да айтдым. |
|
11. |
(Алай этсегиз), Ол сизге кёкден эркин джауум джиберир, |
|
12. |
байлыкъ да, балала да, кёгет бачхала да (берир), баргъан суула бла да саугъалар. |
|
13. |
Сизге не болду, Аллахны сыйына нек ышанмайсыз сора? |
|
14. |
Ол сизни тюрлю-тюрлю халгъа кёчюуде джаратды да. |
|
15. |
Сора сиз кёрмеймисиз, Аллах бир – бири башында, джети кёкню джаратханын, |
|
16. |
анда (кёкде) айны джарыкъ, кюнню уа чыракъ этгенин, |
|
17. |
битимни битдиргенча, сизни да Аллах топуракъдан уста тукъум битдиргенин. |
|
18. |
Ол сизни, (дагъыда топуракъгъа) къайытарады, андан бери да чыгъарады. |
|
19. |
Аллах а сизни тюбюгюзге джерни кюйюз этиб джайды, |
|
20. |
сиз эркин, аны юсюнде джолла салыб джюрюр ючюн”, – деди. |
|
21. |
Бир джолда Нух: “Я, Рабби! Ишексиз, ала меннге бойсунмайдыла. Ала, не байлыкъ, не балала хайыр бермеген, къуру насыбсыз этген затны ызындан барадыла” – деди. |
|
22. |
Ала анга уллу хыйлала этиб кюреше |
|
23. |
(бир-бирине): “Сиз чыртда аллахларыгъыздан; не Уаддан, не Суагъандан, не Ягъусадан, не Ягъукъадан, не Насрадан таймагъыз” – деген эдиле. |
|
24. |
Ала уа (ол аллахла) бек кёблени аджашдырдыла. Ол залимлеге уа (Аллах), Сен, къуру аджашмакъдан башха джукъ къошма!” – деди Нух. |
|
25. |
Ассылыкълары себебли ала суугъа батдырылыб, отха да кийирилдиле. Ала, Аллахдан ёзге, башха кишиден болушлукъ табмадыла. |
|
26. |
Нух да: “Я Рабби! Джер юсюнде кяфырладан бир арбазны да къалдырма. |
|
27. |
Ишексиз, Сен аладан джукъ къалдырсанг, ала Сени къулларынгы тюз джолдан аджашдырырла, бузукълу кяфыр балала да туудурурла. |
|
28. |
Эй, Раббим! Мени ата – анамы, мени юйюме ийманы бла киргенлени да, муъмин эркишилени, тиширыуланы да кеч! Залимлеге уа халекликден ёзге, башха зат къошма!” – деген эди ол. (Нухха Аллах аланы къайытмазларын билдиргенден сора айтханды аны). |
