1. |
Хакъ кюн! |
2. |
Ол хакъ кюн деген неди? |
3. |
Хакъ кюн деген не зат болгъанын а сеннге ким билдирир? |
4. |
Семудну, Адны халкълары да ол ауур кюнню ётюрюкге санагъан эдиле. |
5. |
Семудчуланы айтсакъ, ала чекден чыгъыб халек болгъан эдиле. |
6. |
Адны къауумун айтсакъ, ала да къаты шууулдаб ургъан джел бла халек болгъан эдиле. |
7. |
Ол (Аллах) аны алагъа, джети кече бла сегиз кюнню, тохтаусуз бардырыб тургъан эди. Сен аланы кёрсенг, ичлери къуууш къырылгъан пальма тереклеча, ол къауумну анда сойланыб джатханларын. |
8. |
Сен аладан бир джукъ къалыб кёремисе сора? |
9. |
Фыргъауун да, анга дери джангылычлары ючюн баш тюблерине болгъан элле да, |
10. |
ала бары да Раббийлерини келечисине бойсунмагъан эдиле. Ол да аланы эрши тукъум (къыйынлыкъ бла) тутхан эди. |
11. |
Ишексиз, суу къобуб къутуруб тебрегенинде, Биз сизни сууну башында джюзюб баргъан мазаллы кемеге джюклеген эдик. (Нухну кемеси). |
12. |
Биз аны сизге эсгерме да, (эшитген) къулакъ да аны эсине джыяр ючюн этдик, |
13. |
Сора Сургъа бир кере къаты тукъум юфгюрюлсе, |
14. |
джер да, таула да кёлтюрюлюб бирден чачыу-къучуу болсала, |
15. |
ма ол кюн, ол тюшерик тюшер, (къыямат кюн келир), |
16. |
кёк да джарылыр, аны къарыуу къалмаз. |
17. |
Мёлекле да (ол кюн) аны (кёкню) тёгерегинден алырла. Сени Раббинги тахтасын сегиз (мёлек) кёлтюрюр. |
18. |
Сора сиз (Аллахны аллына) туура болуб барырсыз, сизден биринг да ол кюн джашырылыб къалалмаз. |
19. |
Алайда китабы онг къолуна берилген: “Магъыз, окъугъуз китабымы! |
20. |
Ишексиз, хыйсаб кюннге тюберим (сюд боллугъу) мени эсимде тургъанды (унутмагъанма)”, – дер. |
21. |
Ол адам къууанчлы джашауда болур, |
22. |
мийик джаннетлени ичинде, |
23. |
кёгетлери ийилиб джууукъ келген. |
24. |
Сора алагъа: “Ашагъыз, ичигиз сизге алгъышха, озгъан кюнледе этген (ашхы) ишлеригиз ючюн”, – деб, айтылыр. |
25. |
Китабы сол къолуна берилген адамны айтсакъ а, ол да: “Ай анасыны, бу китабым меннге берилмеген болса эди (аны кёрмей къалсам)! |
26. |
Ол заманда хыйсаб не болгъанын билмей къалыр эдим! |
27. |
Ай анасыны! (Ёлюм бла) мени ишим тыныб къалгъан болса эди. |
28. |
Байлыгъым да мени джугъума джарамады. |
29. |
Баш эркинлигим да менден кетди”, – дер. |
30. |
Сора Аллах: “Тутугъуз да, бугъоулагъыз аны, |
31. |
сора джаханимде кюйдюрюгюз, |
32. |
узунлугъу джетмиш къары болгъан сынджыргъа салыгъыз, |
33. |
ишексиз, ол уллу Аллахха ийман салмай болду, |
34. |
неда мискиннге джукъ ашатыргъа кишини къозгъамады. |
35. |
Энди бюгюн, былайда анга бир джан аурутхан тенг да джокъ, |
36. |
къан – иринден башха анга ашарыкъ да джокъ, |
37. |
аны уа, къуру гюнахлыладан башха киши ашамаз”, – дер. |
38. |
Огъай! Сиз кёрген затла бла да, |
39. |
сиз кёрмеген затла бла да ант этеме, |
40. |
ишексиз, бу (Къуран) чомарт келечини (Джабраилни) сёзлериди. |
41. |
(Сиз айтханча), ала джырчыны сёзлери тюлдюле, сиз къалай къарыусуз ийнанасыз. |
42. |
Неда билгични сёзлери тюлдюле, къалай къарыусуз эсгересиз. |
43. |
Ол (Къуран) гъаламланы Иесинден келген затды. |
44. |
Ол (Мухаммад) Бизни атыбыз бла, бир затла айтыргъа кюрешсе, (кеси аллына Къураннга къошса), |
45. |
аны Биз онг къолундан тутуб, |
46. |
джюрек тамырын кесмей къоймаз эдик. |
47. |
Сизни арагъызда аны тыяллыкъ биреу да табылмаз эди. |
48. |
Ишексиз, ол а (Къуран) такъуалылагъа къуру эсгертген затды. |
49. |
Ишексиз, Биз а аны ётюрюкге кимле санагъанларын, толу билиб турабыз. |
50. |
Ол а (Къуран) кяфырлагъа насыбсызлыкъды. |
51. |
Керти ол, ажымсыз бегиген хакъды. |
52. |
Ол себебден, сени Иенг Уллу (Аллахны) махтаула этиб тазала. |