1. |
Нуун. Къалам бла да, ала (халкъ) аны бла джазгъан зат бла да ант этеме. |
2. |
Раббинги ашхылыгъындан сен джинли тюлсе. |
3. |
Ишексиз, сеннге (Аллахдан) арты болмагъан уллу джал барды. |
4. |
Ишексиз, сен эм уллу (ариу) къылыкъгъа иесе (эм адебли). |
5. |
(Узаймай) сен да кёрюрсе, ала да кёрюрле (тюзню). |
6. |
Сизни къайсыгъыз шашхынлы болгъанын. |
7. |
Ишексиз, (Мухаммад), сени Раббинг, Аны джолундан ким аджашханын да, джолуна ким тюзелгенин да бек билибди. |
8. |
(Мухаммад), сен ол, хакъны ётюрюкге санагъан къауумгъа бойсунма. |
9. |
Ала, сен алагъа джау джакъсанг (ариу сёлешсенг, омакълансанг) сюедиле, ол заманда ала да сеннге джау джагъар эдиле. |
10. |
Кёб ант этиучю, хар бир сыйсызгъа бойсунуб барма, |
11. |
хар бир бедишчиге, тил этиб айланыучугъа, |
12. |
ашхылыкъны кери ургъан, чекден чыкъгъан, гюнахха ташайгъан, |
13. |
кеси хыны (ёхтем), тукъумсузгъа (элде сыйсыз), |
14. |
Ариу ол бай эсе да, джашлары кёб эсе да. |
15. |
Бизни аятларыбыз окъулгъан заманда анга: “Буруннгуланы таурухлары”, – деб, къойгъан. |
16. |
(Мухаммад), Биз аны бурнуна тамгъа салырбыз. (Бадру къазауатда къылыч бла бурну кесилгенди аны). |
17. |
Биз, бурун бир кёгет тереклени иелерин сынагъан кибик, быланы да (меккачыланы) сынадыкъ. Ала танг аласы бла барыб аны кёгетлерин джыймай къоймазгъа ант этген эдиле, |
18. |
алай а “Аллах буюрса”, – деб, айтмагъан эдиле. (Ала ол акъылгъа бек бегиб баргъан эдиле). |
19. |
Сора ала джукълаб тургъан заманда, аны (кёгет бачхасыны) тёгерегинден анга Аллахдан бир къыйынлыкъ келген эди, (уллу джел), |
20. |
танг атаргъа ол, къырылыб джатханча, (къаралыб къалгъан эди). |
21. |
Ала танг аласында бир-бирине таууш эте: |
22. |
“Кёгет джыяр акъылыгъыз бар эсе, джюрюгюз, кёгет тереклеригизге”, – дей. |
23. |
Ала джашыртын шыбырдаша: |
24. |
“Бюгюн ары бир мискин киралмаз”, – дей кетген эдиле. |
25. |
Алай, ол акъылгъа бегиб, ары баргъан эдиле. |
26. |
Ала аны кёргенлеринде уа: “Ишексиз, биз аджашыб келдик болур”, – дедиле. |
27. |
Ала иги къарагъанларында: “Огъай, аны къой, биз къуру огъуна къалдыкъ кёреме”, – дедиле. |
28. |
Сора аланы араларында бир орта ангылагъан: “Мен сизге: “Аллахха махтаула этерге керекди”, – деб, айтмагъанмы эдим”, – деди. |
29. |
Сора ала: “Бизни Раббибиз хар айыбдан тазады, биз терс адамла болдукъ кёреме”, – дедиле. |
30. |
Сора ала ары бурулуб бир-бирин терслерге кёчген эдиле. |
31. |
Ала: “Бизге къыйынлыкъ келди, Биз чекден чыкъдыкъ. |
32. |
Энди муну орнуна Раббибиз бизге мындан да иги кёгет терекле берир эсе уа. Ишексиз, биз Раббибизге талпыйбыз”, – деген эдиле. |
33. |
Ма былайды (бу дунияны) азабы. Ахыратны азабы уа андан уллуракъды, ала аны билалсала. |
34. |
Ишексиз, Аллахдан къоркъгъанлагъа уа, Аллах джанында зауукълукъ джаннетле бардыла. |
35. |
Сора Биз бойсуннганланы бойсунмагъанлачамы этгенбиз? |
36. |
Не болгъанды сизге, сиз къаллайла (оноу этесиз)? |
37. |
Огъесе, сизни дерс окъуб тургъан китабыгъызмы барды? |
38. |
Ишексиз, неда сиз аны ичинден не сюйсегиз да сайлаб айтхан? |
39. |
Огъесе, ишексиз, не сюйсегиз да сиз оноу этген зат къыямат кюннге дери сизге болуб турургъа, Бизни бла деменгили антыгъызмы барды сора? |
40. |
(Мухаммад), бир сор сен аланы къайсысыды аны бойнуна алаллыкъ? |
41. |
Неда (ол затны тындырлыкъ) аланы тенглерими барды? Керти айта эселе келтирсинле бери тенглерин (кёгюзттсюнле). |
42. |
Хар кимни инчиги (айыбы) ачылгъан кюн, ала седжде этерге (баш урургъа) чакъырылырла, алай а этерге къолларындан келмез, (беллери къурушуб ийилялмазла). |
43. |
Кёзлери сюзюлюб, юслерин сыйсызлыкъ басар. Сора алагъа: “Да сиз, баш урургъа сау-саламат заманыгъызда чакъырылгъан эдигиз да”, – деб, айтылыр. |
44. |
(Мухаммад), сен бу хапарны (Къуранны) ётюрюкге санагъанны, Меннге къой да олтур. Биз аланы, ала билмеген джерле бла терилтиб (дуния бла) тереннге (гюнахха) кийирибиз. |
45. |
Мен алагъа, болджал береме, алай а, ишексиз, Мени хыйлам алагъа деменнгилиди. |
46. |
Огъесе, ауур джюк болуб, ала да тёлеялмагъан джалмы тилейсе сен аладан? |
47. |
Огъесе, алада бир таша (билимми) барды, ала джазыб тургъан? |
48. |
(Мухаммад), сен Раббинги оноууна сабырлыкъ эт, китни къарнында адамгъа (Юнюсге) ушама (тёзер керекли). Ол а тар джерде (китни къарнында) Раббисине таууш этген эди (сокъураныб). |
49. |
Анга Раббисини ашхылыгъы джетишгени болмаса уа, сыйсыз халда, къымыжа джерде (тенгиз джагъада), ол алай атылыб къалыр эди. (Кит, бир бёлек кюнден сора, аны тенгиз джагъагъа ташлагъанды). |
50. |
Алай а Раббиси аны сайлагъан эди, аны (кечиб) ашхы къулларындан да этген эди. |
51. |
Ауаз (Къуран) окъулгъанны эшитген заманда, ол къаршчы къауум сени (Мухаммад зар) кёзлери бла джерге аудурургъа аз къаладыла. “Ала, ишексиз, бу уа тамам шашхынлыды”, – дейдиле. |
52. |
Ол а, (Къуран) дунияны башына, къуру ауазды. |