67. Мулк – Патчахлыкъ

1.

(Бютеу) патчахлыкъ кимни къолунда эсе, бары берекетлени бериучю – Олду. Аны неге
да толу къолундан келеди

2.

Сизден къайсыгъыз ашхы ишле этер деб, сизни сынар ючюн, Ол ёлюмню да, джашауну
да джаратхан. Ол а кючю уллу кечиучюдю.

3.

Ол аллай Аллахды, бири-бири башында джети къат кёкню джаратхан. Сен, Рахман
Аллахны джаратхан затларына (кёкге) бир къара, анда бир тешик (кемчилик) кёре
эсенг. Энтда бур кёзлеринги ары, анда бир джарылгъан (зат) кёремисе сора?

4.

Кёзлеринги кер да энтда тёгерекге бир иги къара, ала арыб, талыб (джукъ да
табмай) къайытырла.

5.

Биз дуния кёкню джулдузла бла джасандырдыкъ. Шайтанла (ары чыгъыб, анда
мёлеклени оноуларына тынгыларгъа излеген, заманда) аланы къуууб къыстаучула
этдик аланы (джулдузланы). Биз алагъа отну хазырлаббыз.

6.

Ол Раббийлерине ийнанмагънлагъа, алагъа уа болуру джаханим азабды, ол а къалай
аман орунду.

7.

Ала ары атылгъан заманда, аны гюрюлдеб къайнагъан тауушун эшитирле-

8.

асыры ачыуланнгандан, ол атылыргъа аз къала. Ала ары джоппу – джоппу атылгъан
заманда, аны сакълаууллары (мёлекле) алагъа: “Сора сизге бир ауазчы келмедими
(къалай тюшюб къалдыгъыз былайгъа?)” – дерле.

9.

Ала да: “Хо, Бизге ауазчы уа келген эди, алай а биз аны ётюрюкчюге санагъан
эдик. Биз алагъа: “Аллах сизге бир зат да тюшюрмегенди, сиз къуру уллу
аджашмакъдасыз”, – деген эдик.

10.

Сора ала: “Айхай, биз алагъа бир тынгыласакъ (эс ийиб), неда бир сагъыш этсек,
биз от иелерими болур эдик сора?

11.

Ала терсликлерин ма алай боюнларына алырла. Джаннган от иелери уа къурусунла!

12.

Ичлеринде ташада Раббийлеринден къоркъуб джашагъанлагъа, алагъа уа кечмеклик да,
уллу джал да барды.

13.

Сиз сёзлеригизни сюйсегиз джашырыгъыз, сюйсегиз ачыкъ уллу айтыгъыз (башхасы
джокъду), ишексиз, Ол джюрекледе не болгъанын билибди.

14.

Нени да джаратыб, къалайгъа да джетишиб, хапарлы болуб тургъан къалай билмез эди
сора.

15.

Ол аллай Аллахды, джерни къураб сизни тюбюгюзге салгъан. Аны тюзлеринде да
айланыгъыз, рысхысындан да ашагъыз (кереклигизни), къайытырыгъыз Аны аллынады.

16.

Сора сиз джер тебрениб, Ол кёкдеги сизни джерге джутдуруб къоймазына сиз
ышаннгылымысыз?

17.

Неда, кёкдеги сизге таш – агъач келтирген бир къаты джел джибермезине
ышаннгылымысыз? Сора сиз сакълыкъгъа чакъырыуну (не болгъанын) артда билирсиз.

18.

Былагъа (меккачылагъа) дери, буруннгула да алагъа баргъан келечилени ётюрюкге
санагъан эдиле. Сора алагъа къалай эрши къыйынлыкъ келген эди.

19.

Неда ала, къанатларын бир кериб, бир джыйыб, башларында учуб айланнган
къанатлыланыдамы кёрмейдиле сора? Рахман Аллахдан башха аланы ким тутады (анда
хауада). Ишексиз, Ол хар затны да кёрюбдю.

20.

Сизни, Рахман Аллахдан ёзге, болушурлай аскери болгъан къайсыгъызсыз? Кяфырла
уа, къуру алданыбдыла.

21.

Сора Ол (Аллах) сизден рысхысын тыйыб къойса, сизге рысхы берлик кимди
(бармыды)? Алай а ала къарышыб бекден бек къачадыла.

22.

Сора тюз сюелиб джолуна тюзелиб баргъанмы тюз барады, огъесе, баууруна къабланыб
бети бла джырыб баргъанмы тюз барады? (Бу гяуур бла муслиманнга юлгюдю).

23.

Сен алагъа: “Ол аллай Аллахды сизни джаратыб, эшитирге къулакъ, кёрюрге кёз,
ойлашыргъа да джюрек берген. Къалай къарыусуз шукур этесиз сиз”, – де.

24.

Энтда алагъа: “Ол аллай Аллахды сизни джер юсюне джаратхан, (артда) да сиз Аны
аллына джыйыллыкъ”, – деб, айт.

25.

Ала: “Сиз керти айта эсегиз, бу берген сёзюгюз къачан болур?” – деб, сорадыла.

26.

Сен алагъа: “Билим (бары да), къуру Аллахдады мен а, къуру ачыкъ (аманатны)
айтыб къоркъутуучума”, – де.

27.

Сора ол къаршчыла аны (джаханимни) кёрген заманда бетлери кетер. Сен алагъа:
“Сора ол сиз (ийнанмай) соруучу ма бу олду деб, айтылыр”, – де.

28.

Сен алагъа: “Аллах мени да, биргемдегилени да не тюб этсе, не аяб къойса,
кяфырланы уа, джаханимни къаты азабындан ким сакълар, къалай кёлюгюзге келеди”,
– де.

29.

Сен алагъа: “Ол аллай (Аллахды), биз Анга ийман да салгъан, таяныб да тохтагъан,
рахматлы да болгъан. Сора сиз узаймай, ачыкъ аджашмакъда кимле болгъанын
билирсиз”, – деб, айт.

30.

Сен алагъа: “Сизни (хайырланнган) сууугъуз джер тюбюне кетиб къалса, (Аллах
кетериб къойса), сизге ариу къара сууланы ким берир?” – деб, сор.