|
1. |
Мен ант этеме, Синай тау бла. (Муссагъа Таурат берилген тау). |
|
2. |
Тизгинли китаб бла да |
|
3. |
джайылыб джазылгъан, |
|
4. |
Бейтул Магъмур бла да, (кёкде мёлекле барыучу Кяба) |
|
5. |
кёлтюрюлген чардакъ бла да (кёк), |
|
6. |
джандырылгъан тенгиз бла да: |
|
7. |
ишексиз, сени Раббинги азабы (къыямат кюн) тюшмей къалмаз, |
|
8. |
аны тыяр зат джокъду |
|
9. |
ол кюн а кёк къаты тукъум сенгкилдер, |
|
10. |
таула да къаты тукъум учуб джюрюрле. |
|
11. |
Хакъны ётюрюк этиучюлеге, ол кюн къыйынлыкъ, |
|
12. |
сандыракъгъа ташайыб ойнай тургъанлагъа. |
|
13. |
Ол кюн а аланы тюртюб – тюртюб отха атарла. |
|
14. |
Сора алагъа: “Ма бу ол сиз ётюрюкге санагъан отду, |
|
15. |
бу кёзбаумуду, огъесе, сиз иги кёралмаймысыз? |
|
16. |
Энди кюйюгюз анда! Тёзсегиз да – тёзмесегиз да башхасы джокъду, сиз не этген эсегиз, къуру аны аласыз”, – дерле. |
|
17. |
Ишексиз, такъуалыла джаннетледе, зауукълукъгъа батыб болурла, |
|
18. |
Раббийлери алагъа берген затланы хайырланыб кериле. Раббийлери аланы джаханимни азабындан къутхарыр. |
|
19. |
Алагъа: “Этген ишлеригиз ючюн ашагъыз, ичигиз, |
|
20. |
саф – саф тизилген орундукълада таяннган халда”, – дерле. Биз аланы анда уллу – къара кёз къызлагъа да юйлендирирбиз. |
|
21. |
Кеслери да ийман салыб, ала бла бирча, ийманда ызларындан баргъан туудукъларын да алагъа къошарбыз, (бирге джыярбыз), аланы этген къуллукъларындан а джукъну да кем этмезбиз. Хар ким да этгенине кёре джюкге тюшюбдю. (Этгенин аллыкъды). |
|
22. |
Биз алагъа не сюйселе да кёгетле, этле берирбиз. |
|
23. |
Ала, не бош сёлешдириуу, не гюнах этдириуу болмагъан, ичги аякъланы бир – биринден алышырла. |
|
24. |
Къабындан чыкъмай тургъан инджиле кибик, джашчыкъла да аланы тёгереклерине айланыб джумуш этерле. |
|
25. |
Ала бир – бирлерине бурулуб айтышырла. |
|
26. |
Ишексиз, биз дунияда юйдегибиз бла, азабдан къоркъа эдик. |
|
27. |
Сора Ол да бизни джазыкъсынды, (джаханимни) ургъан исси азабындан да сакълады. |
|
28. |
Биз а аны эртдеден тилеб эдик. Ишексиз, Ол игилик этиучюдю, рахматлыды. |
|
29. |
(Мухаммад)! Раббинги ашхылыгъы бла сен не билгич, не джинли тюлсе, хаман ауаз айтыб эсгерт. |
|
30. |
Огъесе, ала сеннге: “Ол джырчыды, къараб турайыкъ аны арты къалай болурунамы?” – дейдиле. |
|
31. |
Сен алагъа: “Хо, сиз да къараб туругъуз мен да, ишексиз, сизни бла бирге къараб турайым. (Сора кёрюрбюз ким тюз болгъанын). |
|
32. |
Ала бу сёзлени акъыллары къатышыбмы айтадыла, огъесе, ала чекден чыкъгъан къаууммудула? |
|
33. |
Огъесе, муну (Къуранны Мухаммад) кеси айтыргъа кюрешедими дейдиле? Огъай, алай тюлдю, алада ийман джокъду. |
|
34. |
Ала керти айта эселе, анга ушаш бир айтыу (хапар) келтирсинлечи. |
|
35. |
Огъесе, ала бир затсыз, (Джаратыучу болмай) кеслери джаратылыбмы къалдыла сора? Огъесе, ала кеслери джаратыучуламыдыла? |
|
36. |
Огъесе, кёклени, джерни аламы джаратдыла? Огъай, ала ажымсыз ийнанмайдыла. |
|
37. |
Огъесе, Раббини хазналары аланымы къолларындады? Огъесе, хар затны оноуун аламы этедиле? |
|
38. |
Огъесе, аланы кёкге чыкъгъан басхычларымы барды, анда оноугъа тынгыларча? Ол тынгылагъан ким эсе да, келтирсин ачыкъ далилин. |
|
39. |
Огъесе, Аллахны къызлары болуб, сизни джашларыгъызмы барды? |
|
40. |
Огъесе, сен ала тёлеялмазча ауур тёлеу излеб аладан, ала да аны тёлеялмаймы турадыла? |
|
41. |
Огъесе, аланы джазыб тургъан бир таша затларымы барды, (андан алыб айтырлай)? |
|
42. |
Огъесе, ала хыйлала этергеми кюрешедиле? (Мухаммадха къаршчы). Ол ийнанмагъанланы хыйлалары башларынады. |
|
43. |
Огъесе, аланы Бир Аллахдан башха да аллахларымы барды? Ол (Аллах) ала берген сыфатладан (ширкден) бек тазады. |
|
44. |
Ала тюшюб келген кёкню бир кесегин кёрселе да, анга: “Бу къалын булутду”, – дерле. |
|
45. |
Энди сен аланы къой алай, ала боюн тюблерине болгъан кюннге тирелгинчи дери, |
|
46. |
аланы хыйлалары бир джукъгъа джарамагъан, не бир джерден болушлукъ болмагъан кюннге дери. |
|
47. |
Ишексиз, андан (ахыратдан) ёзге да, зулмучу къауумгъа уа, алагъа ары дери дунияда да барды азаб. Алай а аланы кёбюсю аны ангыламайды. |
|
48. |
Раббинги оноууна сабырлыкъ этиб тур, ишексиз, сен Бизни кёз туурабыздаса, (сени унутуб турмайбыз). (Мухаммад эртденде) орнунгдан тургъан чакъда да Раббинги махтау бла тазала. |
|
49. |
Кечени бир кёзюуунде да, Анга тасбихле эт, джулдузланы ызларындан да эт. (Ол кёзюуледе намаз къыл). |
