1. |
Къааф. Бу махтаулу Къуран бла Мен ант этеме. |
2. |
Ала (меккачыла) алагъа кеслерини араларындан бир эсгертиучю келгенине аладан ийнанмагъанлары: “Бу уа бек сейир ишди”, – деб сейирсиндиле. |
3. |
Биз, ёлген да этиб, топуракъ да болгъандан сорамы дейди… Ол къайытыу уа болмазлыкъ затды”, – дедиле. |
4. |
Биз, джер (кесине алыб) аладан, нени кем этгенин билебиз. Бизни джаныбызда хар нени сакълаучу китаб барды. (Лаухул махфузда Бизге бары да белгилиди). |
5. |
Алай болса да, алагъа хакъ келгенинде, ала аны ётюрюкге чыгъарадыла. Кеслери да тентек болуб чайкъалыудадыла. |
6. |
Сора ала башларында кёкню дамы кёрмейдиле? Биз аны къалай ишлегенибизни, къалай джасандыргъаныбызны? Анда бир джарылгъан бармыды сора, (аны ишлеучюге бир ойлашмаймыдыла?) |
7. |
Джерни айтсакъ, аны да Биз аланы тюблерине джайыб, аны юсюне мийик тауланы да къураб, тюрлю – тюрлю ариу битимле ёсдюрдюк да. |
8. |
(Ала бары да ойлашыргъа сейир затладыла) кёзю болуб кёргеннге, эси болуб эсгергеннге, Аллахха бурулган къулгъа. |
9. |
Дагъыда Биз, кёкден берекетли сууну эндириб кёгет бачхаланы, орулгъан мюрзеуню битдиребиз да, |
10. |
аны кибик узун хурма терекле, джоппу – джоппу кёгетлери бла, |
11. |
къулларыбызгъа рысхыгъа. Ёлюб тургъан джерни, Биз ма алай сау этебиз (суу бла). Адамланы къабырдан чыгъарлары да ма аны кибикди. |
12. |
Алагъа дери, бурун Нухну халкъы, Рассачыла, Самудну къаууму да ётюрюкге санагъан эдиле, |
13. |
(аны кибик) Адны, Фыргъауунну халкъы да, Лутну къарнашлары да, |
14. |
Айка деген элчиле да, Туббаны къаууму да. Ала бары да баргъан келечилени ётюрюкчюле этген эдиле. Алагъа берилген сёз да толу болгъан эди. (Тюб болгъан эдиле). |
15. |
Биринчи кере джаратмакъ Бизге ауурлукъ этдими сора? Огъай, ала джангыдан джаратыугъа экили болуб къатышыбдыла. |
16. |
Керти болуб, Инсанны Биз джаратдыкъ, аны кёлюне ургъан уасуасаны да билиб турабыз. (Хаманда аны биргесинебиз) аны къой, биз анга боюн тамырындан эсе да джууугъуракъбыз. |
17. |
(Эсге ал) эки мёлек адамны онгундан да, солундан да олтуруб, аны ишин джазыб, алыб тургъанларын. |
18. |
(Эсге ал), адам ауузундан бир деб бир сёзню чыгъармайды, биргесине джазаргъа хазыр болуб сакълаб тургъан мёлеги болмай. |
19. |
Сора сеннге хакъ ёлюм эсириги келсе: “Ма бу ол сен (сюймеген), къачаргъа кюрешген затды”, – деб, айтылыр. |
20. |
Сора къаты таууш болур: “Бу ол сёз берилген кюндю”, – деб. |
21. |
Хар бир адам ол кюн (сюдге) биргесине бир сюрюучюсю, бир шагъаты бла келир. |
22. |
Аллах анга: “Бу затны (дунияда) сен сан этмегенсе, алай болса да, Биз бюгюн сени кёзлеринги джабыуун ачабыз, кёзлеринг темирча къаты кёредиле. |
23. |
Сора нёгери (джазыучу мёлеги): “Ма бу, мени джанымда хазырлаб тургъан затымды”, – деб, берир. |
24. |
(Сора Аллах мёлеклеге): “Экинг да, ол хар бир ийнанмай къарышыб тургъанны джаханимге атыгъыз, |
25. |
ашхылыкъгъа къаты чарлагъан, чекден чыкъгъан, джаулукъ джюрютген, ишекликни джайгъан, |
26. |
Аллахны биргесине да башха Аллах этген. Экисин да бирге къаты азабха салыгъыз, (шайтан нёгери бла). |
27. |
Сора аны нёгери (шайтаны): “Эй, Раббибиз! Муну мен терсейтмедим, ол кеси да узакъ аджашыб тургъан адам эди”, – дер. |
28. |
Аллах да: “Мени аллымда даулашмагъыз, Мен сизге сёз бериб къоркъууну билдирген эдим. |
29. |
Мени джанымда берилген сёз тюрленмейди, неда Мен къулларыма артыкълыкъ этиучю тюлме”, – дер. |
30. |
Сора ол кюн Биз джаханимге: “Толдунгму?” – деб, сорурбуз. Ол да: “Бир къошакъ джокъмуду?” – дер. |
31. |
Аллахдан къоркъгъанлагъа (ол кюн) джаннет джууукъ келир, узакъ болмаз. |
32. |
Аллах алагъа: “Ма бу сизге сёз берилген джаннет; таубачылагъа, (дин джорукълагъа) сакъ болуучулагъа, |
33. |
ичлеринде Рахман Аллахдан къоркъа билгенлеге, кеси да Аллахына ийилген джюрек бла келгенлеге, |
34. |
киригиз энди саламатлы бу джаннетге. Бу кюнюгюз сизни ёмюрлюкдю”, – деб, айтылыр. |
35. |
Анда алагъа сюйген затлары табылыр. Бизни джаныбызда уа алагъа андан да артыгъы барды, (ала билмеген, эшитмеген, кёллерине да келмеген затла). |
36. |
Алагъа дери бурун да Биз нелляй бир тёлюню тюб этдик, ала быладан эсе да, къарыу бла кючлюрек эдиле. Ала бир кирир тешик табсакъ эди деб, излеген эдиле. Къутулур джер а къайда? |
37. |
Ишексиз, ма ол затда да джюреги болгъаннга, не къулагъын салгъаннга, не кёзю болуб кёргеннге ойлашыргъа оюм барды. |
38. |
Керти болуб, Биз кёкле бла джерни, аланы араларында болгъанны да алты кюннге джаратдыкъ, аны ючюн Бизге не аз да арымакъ джетмеди. |
39. |
(Мухаммад), сен аланы айтханларына сабырлы бол. Кюн чыгъарны аллы бла, кюн батарны аллы бла уа Раббинге махтаула этиб тазала, |
40. |
кечени бир кёзюуюнде да, седжделеден (намаздан) сора да махтаула эт. |
41. |
Сен ангыла! Бир кюн, бир къычырыучу мёлек джууукъ джерден къычырыр. |
42. |
Адамла бары да хакъ ол тауушну эшитирле. Ол а адамла къабырдан чыкъгъан кёзюу болур. |
43. |
Ишексиз, джан салгъан да, ёлтюрген да Бизбиз, аланы келирлери да Бизгеди, |
44. |
джер джарылыб – джарылыб ала андан гузаба чыкъгъан кюн. Ол тукъум джыйыу Бизге бек тынчды. (Къыйын ишге кёрмегиз). |
45. |
(Мухаммад) аланы не дегенлерин Биз билиббиз. Сен аланы зорлаучу тюлсе. Ол себебден азабдан къоркъа билгенни, айтыб Къуран бла эсгерт. |