|
1. |
Биз сеннге (Мухаммад), ачыкъ хорламны саугъаладыкъ, |
|
2. |
Аллах сени алдагъы гюнахларынгы да, артдагъы гюнахларынгы да кечиб, нигъматларын да толу бериб, сени тюз джолгъа тюзетир ючюн, |
|
3. |
Аллах сеннге кючлю тукъум да болушур ючюн. |
|
4. |
Ол аллай Аллахды, муъминлени джюреклерине хошлукъну салгъан, ийманларыны юсюне дагъыда ийман къошулур ючюн. Кёклени, джерни аскерлери бары да Аллахныкъыды. Аллах а нени да билибди, акъыл Иесиди. |
|
5. |
Ол (Аллах) муъмин эркишиле бла муъмин тиширыуланы, ёмюрлюкге, тюблери бла суула баргъан джаннетлеге кийирир ючюн, аман ишлерин да кетерир ючюн. Ол а Аллах джанында уллу насыбды. |
|
6. |
Ол (Аллах) мунафикъ эркишилеге, мунафикъ тиширыулагъа да, мушрик эркишилеге, мушрик тиширыулагъа да, Аллахха аман оюмла джюрютгенлеге, аланы аманлыкълары башларына джетиб, азаб берир ючюн. Алагъа Аллах чамланыр ючюн, налат да берир ючюн, джаханимни да хазырлар ючюн. Аланы барыр джерлери къалай аманды. |
|
7. |
Кёклени, джерни аскерлери да Аллахныкъыды. Аллах а хорлаучуду, акъыл Иесиди. |
|
8. |
Ишексиз, (Мухаммад), Биз сени (халкъгъа) шагъатлыкъ этиучю, къууандырыучу, сакълыкъгъа чакъырыучу этиб джибергенбиз (зорлаучу тюлсе). |
|
9. |
Сиз Аллахха да, келечисине да ийнаныб, Анга болушлукъ этерге, Аны сыйын да кёрюрге, эртден, ингир да тасбихле этиб Аны тазаларгъа. |
|
10. |
(Мухаммад), ол сеннге ант бергенле, ала Аллахха ант бередиле (билсинле). Аллахны къолу аланы къолларыны юсюндеди. Сора антын ким ойса, ол кесине зараннга ояды. Аллахха берген сёзюн толтургъаннга уа, Ол анга уллу джал берир. |
|
11. |
Сени бла къазаууатха чыкъмай къалгъан кёчгюнчю араблыла: “Бизни малыбыз, юйдегибиз тыйды, кеч бизни”, – дерле. Ала ауузлары бла джюреклеринде болмагъан затны айтадыла. Сен алагъа: “Аллах сизге не бир заран, не бир хайыр этерге излесе, сизни Андан, не аз да сакъларгъа къолундан келлик бармыды сора?” – деб, сор. Аны къой эсенг, Ол сизни этген ишлеригизден толу хапарлыды. |
|
12. |
Огъай, сизни акъылыгъыз а: “Расул да, муъминле да чыртда юйлерине сау къайытмазла”, – деб, болгъанды. Сизни ол (акъылыгъыз) джюреклеригизге ариу кёрюндю. Аллай аман акъылла джюрютдюгюз да, халекликге тыйыншлы къауум болдугъуз. |
|
13. |
Аллахха, Аны келечисине ийнанмагъан къаршчылагъа, Биз къызгъан отну хазырлаббыз. |
|
14. |
Кёклени, джерни эркинлиги да Аллахны къолундады. Кечерге тыйыншлы кёргенин кечеди, азаб берирге тыйыншлы кёргенине азаб береди. Аллах а кечиучюдю, рахматлыды. |
|
15. |
Сиз къазауатда тюшген байлыкъны алыргъа баргъан заманда, ол юйде къалгъанла: “Бизни да сизни бла барыргъа къоюгъуз”, – дерле. Ала Аллахны сёзюн тюрлендирирге излейдиле. Сен алагъа: “Сиз, чыртда, бизни бла келлик тюлсюз, Аллах алда огъуна да алай айтханды”, – деб айт. Сора ала да сизге: “Сиз бизге зарланыб этесиз”, – дерле. Огъай, алай тюлдю, ала бек къарыусуз ангылагъанладыла. |
|
16. |
(Мухаммад), сен ол къазауатха бармай къалгъан араблылагъа: “Сиз узаймай бир аман къауум бла къаты къазауат этерге чакъырылырсыз да, не сиз ала бла къазауат этерсиз, неда ала муслиман болурла. Ол заманда буйрукъгъа сиз бой салсагъыз, Аллах сизге ашхы тукъум джал берир. Алай болмай, биягъынлай джанласагъыз а, Ол сизге къаты тукъум азаб берир”, – деб айт. |
|
17. |
Сокъургъа зорлукъ джокъ, асхакъгъа да джокъ, ауругъаннга да джокъ зорлукъ. Аллахха да, Аны келечисине да бой салгъанны, Ол тюбю бла къобанла баргъан джаннетлеге кийирир, бойсунмай, джанлагъаннга уа къаты азаб берир. |
|
18. |
Ол терек тюбюнде муъминле сеннге ант берген заманда, Аллах алагъа разы болду, аланы ичлеринде болгъанны да билиб, джюреклерине хошлукъ (таукеллик) салды. |
|
19. |
Аны кибик сиз кёб тюрлю хайырла алгъан эдигиз, (къазауатда тюшген затла). Аллахны уа кючю уллуду, Ол акъыл Иесиди. |
|
20. |
Аллах сизге (къазауатда) кёб хайырла тюшюрюрге сёз берген эди, ол сёзюн къысха заманны ичинде тындырды. Аманланы сууукъ къолларын сизден тыйгъан да этди. Ол муъминлеге ойлашыргъа сейир зат болур ючюн, сизни да тюз джолгъа тюзетир ючюн. |
|
21. |
Дагъыда бусагъатда сизни къолугъуздан келмеген, Аллахха ачыкъ болуб, Ол сизге сакълаб тургъан, (энди къазауатлада тюшерик) башха хайырла да. Аллахны уа неге да къолундан келиучюдю. |
|
22. |
Ол кяфыр къауум сизни бла къазаууат этселе, ала ызларына бурулуб къачарла. Сора ала кеслерине не бир джан аурутхан, не бир болушуучу табмазла, |
|
23. |
ол бурундан келген Аллахны джоругъуду. Аллахны джоругъуна уа сен бир тюрлениу табмазса. |
|
24. |
Ол аллай Аллахды, Мекка тюзюнде, Ол сизни аладан онглу этгенден сора, аланы къолларын сизден, сизни къолларыгъызны аладан тыйгъан. Аллах а сизни не этгенигизни толу кёрюбдю. |
|
25. |
Ала аллайладыла, кеслери да ийман салмай, сизни да Харам Масджидге джибермей, къурман малларыгъызны да орнуна барыргъа къоймай кюрешиб тургъан. Анда сиз танымагъан, муъмин эркишилени, тиширыуланы, сиз билмей аланы не теблеб, не ёлтюрюб, не джаралы этиб къыйынлыкъ бериб, гюнахлы болуб къалырсыз деб, Аллах тыйгъаны болмаса, Ол сизге ары (зорлаб) кирирге эркинлик берир эди. Аллах кесини рахматына кимни сюйсе аны кийиреди. Алай а сиз тайгъанлай, Биз ол къаршчылагъа термилтген азаб берир эдик. |
|
26. |
(Мухаммад), сен эсге ал, джахил заманда къайнагъанча кяфырланы джюреклери энтда къайнаб тургъанлай, Аллах расулуна да, муъминлеге да хошлукъ тюшюрюб, джюреклерине да такъуалы сёзню (келиматуш-шахаданы) салыб бегитди. (Гяуурладан эсе) ала ол затха да, анга (Кябагъа) ахлу болургъа да бек тыйыншлы эдиле. Аллах а хар затны да толу билиучюдю. |
|
27. |
Аллах а расулуну тюшю хакъ болгъанын белгили этди: Аллах айтса башларыгъыз джюлюнюб, чачларыгъыз кесилиб, къоркъуусуз, рахат Харам Масджидге киресиз. Аллах а сиз билмеген затланы биледи. Кёб болмай Ол сизге андан башха да бир хорлам берген эди. |
|
28. |
Ол аллай Аллахды, ислам динни башха динлени барындан да баш этиб ачыкълар ючюн, тюз джолну да, хакъ динни да бериб кесини келечисин (халкъгъа) джиберген. Шагъатлыкъ орнуна Аллах толу джетишеди. (Хар затха болгъаннга, боллукъгъа да Ол толу туурады). |
|
29. |
Мухаммад – Аллахны келечисиди. Аны биргесиндегиле уа кяфырлагъа къатыла, ёхтемле араларында бир бирине джумушакъла. Аллахны чомартлыгъын, разылыгъын излеб дыгалас этиб сен аланы рукула, седжделе этиб кёрюрсе. Бетлеринде да седжде этгенлерини тамгъасын кёрюрсе. Аланы сыфатлары Тауратда, Инджилде да джазылыбды. Инджилде сыфатларын айтсакъ; джерден (урлукъ) чыгъыб, бир битим, сора ол ёсюб уллу болуб тереги къатыб, кеси да мийик болгъан, сора (аламат болуб), сабанчыланы сейирсиндирген, кяфырланы уа ачыуландыргъан. (Бу Мухаммадны уммети ёсюб кёбейирине, Инджилде эртдеден айтылыб тургъан юлгюдю). Аллах ийман салыб, ашхы къуллукъла этиб тургъан адамланы кечерге да, уллу саугъала берирге да сёз береди. |
