|
1. |
Ха, миим. |
|
2. |
Хар нени ачыкълаучу китаб бла ант этеме. |
|
3. |
Ишексиз, Биз аны (Къуранны) бир беректли (сыйлы) кечеде тюшюрдюк, (къадыр кече). Ишексиз, Биз сакълыкъгъа чакъырабыз. |
|
4. |
Ол кечени ичинде акъыл ишле, бары, оноу этилиб айырылады, |
|
5. |
Бизни джаныбыздан буйрукъ бла. Ишексиз, Биз келечиле джибериучюбюз, |
|
6. |
сени Раббинги рахматы бла. Ишексиз, Ол нени да эшитибди, нени да толу билибди. |
|
7. |
Ол кёклени, джерни да аланы арасында болгъан затланы да Раббисиди. Сиз Анга ажымсыз болаллыкъ эсегиз. |
|
8. |
Ол болмаса, башха тюрлю бир аллах джокъду, тирилтген да ёлтюрген да Олду, сизни Раббигиз да, бурун аталарыгъызны Раббиси да (болгъан). |
|
9. |
Алай а ала (мушрикле) ишекликде ойнай турадыла. |
|
10. |
(Мухаммад), сен, алагъа (меккячылагъа) кёкден ачыкъ тютюн келлик кюнню аллына къараб тур, |
|
11. |
ол адамланы юслерин джабар. Ол а термилтген азабды. (Къургъакълыкъ къысыб, чарс болуб, кёкде тютюн кёрюнюб, ачлыкъ къыйынлыкъ келгенди меккячылагъа, бойсунмагъанлары ючюн). |
|
12. |
(Сора ала): “Эй, Раббибиз! Биз ийман келтирдик бу къыйынлыкъны бизден бир ач”, – деб, тилерле. |
|
13. |
Ол заманда ангылагъандан а не хайыр, ары дери алагъа келечи келиб ачыкъ айтхан эди да, |
|
14. |
сора ала сан этмей ары бурулуб: “Юретилген бир джинли”, – деген эдиле. (Джинлени сёзлери бла сёлешген). |
|
15. |
Ишексиз, Биз къыйынлыкъны бир кесек ачханлай, олсагъат, сиз да ызыгъызгъа къайытырсыз. |
|
16. |
Биз аланы (мушриклени) къаты тукъум ургъан кюн, ишексиз, Биз аладан къан алырбыз. |
|
17. |
Алагъа дери бурун Биз Фыргъауунну къауумун да сынагъан эдик. Алагъа бир сыйлы келечи (Мусса) келген эди. |
|
18. |
(Ол алагъа): “Аллахны къулларын беригиз меннге, ишексиз, мен (Аллахдан) сизге ышангылы келечиме, |
|
19. |
Аллахха уллу кёллюлюк этмегиз, ишексиз, мен сизге ачыкъ далил бла келгенме. |
|
20. |
Ишексиз, сиз мени ташла бла тюймекден, мени да сизни да Иегиз болгъан Раббим бла сакъланама. |
|
21. |
Меннге ийнанмай эсегиз а мени тынч къоюгъуз (кюрешмегиз мени бла)”, – деген эди. |
|
22. |
Сора (Мусса): “Была ассы халкъдыла”, – деб Аллахына дууа этген эди. |
|
23. |
(Аллах Муссагъа): “Мени къулларымы ал да, кече бла тай, ишексиз, ызыгъыздан сюрюлюрсюз. |
|
24. |
(Сиз ары ётюб) тенгизни бош къоюгъуз, ала, ишексиз, ары батар аскердиле”, – (деген эдик). |
|
25. |
Нелляй бир кёгет бачхала, баргъан къара суула, |
|
26. |
сабанла, сыйлы орунла (ала къыйынларын салгъан омакъ юйле), |
|
27. |
ала зауукъланыб тургъан нелляй бир ашхы затла къойгъан эдиле ала (артларында) |
|
28. |
Да ма аланы барына да (Биз алагъа берген затлагъа), бир башха къауумну ие этген эдик. |
|
29. |
(Ол халек болгъанлагъа), алагъа не кёк, не джер джыламады, неда алагъа болджал берилмеди. (Ашхы адам ёлсе кёкле да, джер да къыркъ кюнню джылайдыла деб, хадисде алай айтылады). |
|
30. |
Бану Исраиллени уа, Биз ол сыйсыз азабдан къутхаргъан эдик, |
|
31. |
Фыргъауундан. Ол ишексиз, уллулукъгъа кетиб халек болгъан эди. |
|
32. |
Биз а, аланы (Бану Исраиллени) джер юсюнде билим бла сайлагъан эдик. |
|
33. |
Алагъа ичлеринде ачыкъ сынам болгъан аятларыбызны да берген эдик. |
|
34. |
Сора, ишексиз, ала да айта эдиле: |
|
35. |
“Бизге боллугъу, къуру биринчи ёлгенибизди, андан сора бизге (Аллахны аллына) джыйылыу деген, ол болур зат тюлдю. |
|
36. |
Келтиригиз бери бизни бурун аталарыбызны, сиз керти айта эсегиз”, – деб. |
|
37. |
Сора аламы хайырлыдыла, огъесе, Тубба халкъы бла алагъа дери болгъанламы хайырлыдыла? Аланы уа Биз тюб этгенбиз, ала бойсунмагъан ассыла эдиле. |
|
38. |
Кёклени да, джерни да, аланы арасында болгъан затланы да Биз ойнаб джаратмадыкъ. |
|
39. |
Биз аланы хакъ (керек болуб) джаратдыкъ, алай а адамланы кёбюсю аны ангыламайды. |
|
40. |
Ишексиз, халкъ джыйылыб (аман, иги) айырылгъан кюн, ол аланы барына да салыннган болджалды. |
|
41. |
Ол не тенг тенгине бир мадары да (хайыры) болмагъан, не алагъа бир болушлукъ да табылмагъан кюндю, |
|
42. |
къуру Аллах джазыкъсыннган адам болмаса. Ол а бек кючлюдю, рахматлыды. |
|
43. |
Ишексиз, “заккъум”, – деген терек, |
|
44. |
гюнахлыланы ашыды. |
|
45. |
Ол къарынлада, эриген темирча, къайнар |
|
46. |
къайнагъан исси сууча. |
|
47. |
“Тутугъуз аны, сюйреб барыб джаханимни арасына атыгъыз. |
|
48. |
Сора анга башындан къайнагъан сууну къуйуб, азаб беригиз. |
|
49. |
Чек азабны, керти сен бек кючлю, сыйлы адамса. |
|
50. |
Ма бу, ол сиз ишекли болуб тургъан затды”, – деб айтылыр. |
|
51. |
Ишексиз, Аллахдан къоркъгъанла, ала уа ышангылы орунлада болурла, |
|
52. |
кёгет тереклени, баргъан сууланы арасында, |
|
53. |
атлас, парча кийимлеге кийиниб, бир-бирлерине айланыб олтуруб. |
|
54. |
Да алй, Биз аланы анда уллукёз хур къызлагъа да юйлендирирбиз. |
|
55. |
Ала анда къайгъысыз, сагъышсыз, керекли кёгетлери табыла турурла. |
|
56. |
Ол биринчи ёлюмден сора ала анда ёлюм кёрмезле. (Аллах) аланы джаханим азабдан сакълады, |
|
57. |
Раббинги чомартлыгъы бла. Ол а бек уллу хорламды (насыбды). |
|
58. |
Ишексиз, Биз бу (Къуранны) уа сени тилингде (алагъа) тынч этдик, ала аны ангылаб эсгералыр эселе. |
|
59. |
(Мухаммад), сен да ашыкъмай сакълаб тур (Аллахны болушлугъун буйругъун, болджал кюнню), ала да сени (къорарынгы) сакълаб турадыла. |
