1. |
Ха, миим. |
2. |
Хар нени баямлаучу бу китаб бла (Къуран бла) ант этеме. |
3. |
Ишексиз, бу китабны Биз араб тилде этдик, сиз аны сагъыш этиб бир сюзер эсегиз а. |
4. |
Ишексиз, ол Бизни джаныбызда мийик, акъылман джазыуланы аналарында (Лаухул махфузда) сакъланыбды. |
5. |
Сора сиз чекден чыкъгъан къауумсуз деб, Биз эсгертиуню (китабыбызны иймей) сизден тыйыбмы къояйыкъ? |
6. |
Биз буруннгулагъа да нелляй бир файгъамбар джиберген эдик. |
7. |
Алагъа баргъанладан хыликке этмей, ала бир файгъамбарны да къоймадыла. |
8. |
Биз, къарыу бла быладан эсе кючлю болгъан (эллени) тюб этгенбиз, алай а была, ол буруннгуланы озгъан юлгюлерин сан этмейдиле. |
9. |
Сен алагъа: “Кёклени, джерни ким джаратды?” – деб, сорсанг – ала сёзсюз: “Аланы уа бир кючлю, билимли Аллах джаратханды” – дерле. |
10. |
Ол (аллай Аллахды) джерни сизге тёшек этген, аны юсюнде джолланы къурагъан (керекли джерге сиз тюзелиб барыр ючюн), тюз джолгъа бир тюзелир эсегиз а. |
11. |
Ол аллай Аллахды, кёкден мардалы сууну эндирген. Сора Биз аны (джауумну) ёлюб тургъан джерге джайыб джан салабыз да, (сиз кёре). (Сизни къабырдан) чыгъарыгъыз да ма алайды. |
12. |
Ол Аллай Аллахды, хар затны пара – пара джаратхан, ол сиз миниб джюрюген кемелени да, хайуанланы да къурагъан, |
13. |
сиз аланы юслерине миниб рахатланыб, Раббигизни этген ашхылыгъын да эсгере: “Быланы бизге бойсундуруб, ишлетиб тургъан Аллах тазады, бизни алагъа къарыуубуздан келлик тюл эди. |
14. |
Ишексиз, биз Раббибизге къайытырыкъбыз”, – деб, айта ала аланы юслерине олтургъан заманда. (Улоугъа, транспортха минсе айтылыучу). |
15. |
Ала уа Аны къулларындан Анга юлюш этдиле (сабий джораладыла). Ишексиз, адам ачыкъ кяфырлыкъгъа кетиучюдю. |
16. |
Сора Ол кеси джаратханладан кесине къызланы алыб, сора сизге джашланымы сайлады? |
17. |
Ол сиз Рахман Аллахха атагъан (мёлекле Аллахны къызларыдыла деб), сизни биригизге сюйюмчю айтылса уа (къыз тууду деб), ол бети тюрлениб, къыйналгъанын ичинде джутдурургъа кюреше, мыдах болады. |
18. |
Неда кеслерин джасандыргъандан, бири – бири бла гурушха болуб даулашхандан башха джукъ къайгъылары болмай ёсген къызланымы теджейсиз сиз Аллахха. |
19. |
Ала Аллахха къул болуб тургъан мёлеклени да, Анга къызла этдиле. Ала аланы къалай джаратылгъанларына къарабмы турдула? Аланы шагъатлыкълары джазылыб, ала джууабха тартылырла. |
20. |
Дагъыда ала: “Рахман Аллах сюйсе биз алагъа табынмаз эдик”, – дедиле. Бир зат билимлери да болмагъанлай ала, къуру кеслери алларына сёлешедиле. |
21. |
Огъесе, Биз мынга дери, ала (джорукъ этиб) тутарлай, алагъа китабмы бердик, (ала аны бла сёлеширлей?) |
22. |
Огъай, ала къуру: “Ишексиз, аталарыбызны бир динни юсюнде табханбыз, энди биз да аланы ызларындан барабыз”, – дедиле. |
23. |
Аны кибик, сеннге дери да Биз эллеге ненча келечи (ауазчы) джиберген эсек да, аланы бай къаууму хаманда: “Огъай, ишексиз, биз ата-бабабызны бир джолда табханбыз, энди ол джолдан таярыкъ тюлбюз”, – деб тохтадыла. |
24. |
Ол алагъа: “Мен сизге келтирген (дин) ол сиз аталарыгъыздан кёрген динден эсе, тюзюрек дин эсе уа?” – деди. Ала да анга: “Ишексиз, ол сиз джиберилген затха, биз ийнанмайбыз”, – дедиле. |
25. |
Сора Биз аланы айыбларына джолукъдургъан эдик. Ол ётюрюк этиучюлени артлары къалай болгъанына сен бир (иги) къара. |
26. |
(Сёз ючюн): Ибрахим, атасына да, къауумуна да: “Мен ол сиз табыннган затладан кенгме, |
27. |
мени Джаратхандан ёзгеледен. Ишексиз, мени тюз джолгъа тюзетирик Олду”, – деди. |
28. |
Ибрахим, артында къалгъан тёлюлеге (тюз) сёзню айтхан эди, (Аллахны бирлигин бегитиб кетген эди), была да (меккачыла) тюшюнюб, бир къайытыр эселе уа. |
29. |
Огъай, хар затны ачыкълай, хакъны алыб алагъа келечи келгинчи дери да алагъа да, аланы ата бабаларына да дуния кереклилерин бериб тургъан Менме. |
30. |
Сора алагъа хакъ келгенинде уа ала: “Бу кёзбауду, биз анга чыртда ийнанмайбыз”, – дедиле. |
31. |
Ала: “Бу Къуран эки уллу (Мекка бла Тайиф) элни адамларыны бирине тюшсе эди ансы”, – дедиле. (Бийледен бирине). |
32. |
Сени Раббинги рахматын юлешиучюле аламыдыла сора? Аланы араларында дунияда джашауларын, Биз юлешиб беребиз. Аланы бир къауумун бир къауумундан эсе, дараджада (байлыкъ бла) ёрге кёлтюребиз, бири-бирин ишлетиб хайырланыр ючюн. Алай а ол ала джыйгъан затдан эсе, Раббинги рахматы хайырлыды, (ангылагъаннга). |
33. |
Биз, адам улу бары да бир джамагъат болуб къалырла деб къоркъгъаныбыз болмаса, (гяуурлагъа сукъланыб, гяуур болуб къалырла деб), Рахман Аллахха ийнанмагъанланы юйлерини чардакъларына дери, ёрге чыкъгъан басхычларына дери, кюмюшден этер эдик, |
34. |
юйлерини эшиклерине, джатхан орундукъларына дери, кюмюшден ишлер эдик, |
35. |
аны кибик тюрлю – тюрлю джасанмала да (берир эдик). Алай а ала бары да, къуру бу дунияны кесек харакетиди. Аллахдан къоркъгъанлагъа уа, Раббинги джанында ахырат хазырды. |
36. |
Рахман Аллахны эсгериуден джанлагъаннга уа (сан этмегеннге), Биз юсюне шайтанны бошлайбыз, ол да аны джолдашыды. |
37. |
Ишексиз, шайтанла аланы тюз джолдан тыйыб турурла, ала да (кертда) тюз джолдабыз деб, алай оюм этиб турурла. |
38. |
Сора келиб Бизни аллыбызгъа сюелселе уа ала: “Ай анасыны! Мени бла сени арабыз кюнчыгъыш бла кюнбатыш кибик узакъ болса эди! Къалай аман нёгер болдунг сен”, – дерле. |
39. |
Аллах алагъа: “Айхай да, сизни бюгюн ёкюнюуюгюз сизге, чыртда, хайыр бермез, эндиге дери сиз зулмучула болгъаныгъыз ючюн, азабда тенгсиз (адам да, шайтаны да)”, – дер. |
40. |
(Мухаммад), сен а сангыраугъа джукъ эшитдиралырмыса, неда сокъурну джолгъа салалырмыса, ачыкъ аджашмакъда болгъан адамны? |
41. |
Биз ариу сени къоратхан болсакъ да, ишексиз, аладан а къан алмай къоймазбыз. (Мухаммад бир ёле кирсе, дегендиле душманла, ол анга джууаб эди). |
42. |
Неда алагъа бериб тургъан сёзюбюзню, Биз сеннге (саулугъунгда) кёгюзтмей къоймазбыз, Бизни алагъа къарыуубуз а джетер. |
43. |
Ол сеннге Аллахынгдан ачылгъан затны (таймай) кючлю тут, ишексиз, сен тюз джолдаса (чайкъалма). |
44. |
Ишексиз, бу Къуран сеннге да, къауумунга да (унутмай) эсде тутар ауазды. Ишексиз, сиз артда (къыямат кюн), аны ючюн (Къуран ючюн) джууаб берисиз. |
45. |
(Мухаммад), Биз сеннге дери джиберген келечилерибизге бир сор; Биз Рахман Аллахдан ёзге, къуллукъ этиллик аллах къурадыкъмы сора? |
46. |
Биз, сейир аятларыбызны да бериб, Фыргъауун бла аны халкъына, Муссаны джиберген эдик. Ол алагъа: “Ишексиз, мен аламланы Иеси Аллахдан келечиме”, – деген эди. |
47. |
Ол алагъа Бизни аятларыбызны алыб келген заманда, ала хыликке этиб анга кюлген эдиле. |
48. |
Бири биринден артыкъ сейир болмагъан, Биз алагъа бир аят кёгюзтмеген эдик, (алай а ала аны ючюн да тюшюнмедиле). Сора биз аланы азабха салгъан эдик, ким биледи, была (меккачыла) тюшюнюб бир къайытыр эселе уа. |
49. |
Ала анга (Муссагъа): “Эй, Хыйнычы! Сен Раббингден бир тиле, сени юсюнг бла Ол бизге сёз бергенин (бир кёрейик), ол заманда биз тюз джолгъа тюзелирбиз”, – деген эдиле. (Мусса Аллахдан тилеб алагъа бир къыйынлыкъ келсе уа сора: “Мусса, сен Аллахынгдан бир тиле, Ол аны бир тайдырсын, ол заманда сени Аллахынга къайытырбыз”, – дей эдиле). |
50. |
Сора Биз аладан къыйынлыкъны ачсакъ, ала да, (хар джол сайын) сёзлерин бузуб тургъан эдиле. |
51. |
Сора Фыргъауун: “Эй халкъым! Мисирни патчахлыгъы да, бу мени тюбюм бла баргъан къобанла да, бары да меникиле тюлмюдюле, кёрмеймисиз сиз сора? |
52. |
Менми игиме, огъесе ол иги да сёлешалмагъан (Мусса), сыйы да болмагъан тилкъауму игиди? |
53. |
Аны юсюнде не алтын буунлукълары, неда аны биргесине мёлек нёгерлери болса бир эди ансы”, – деб, таууш этген эди. |
54. |
Алай бла ол халкъын терсейтген эди, ала да анга бой салгъан эдиле. Ишексиз, ала пасыкъ халкъ эдиле. |
55. |
Ала Бизге къаршчы тургъанларында, Биз аланы барын да суугъа батдырыб, аладан къан алгъан эдик. |
56. |
Артда келликлеге аланы (ойлашыргъа) юлгю этген эдик. |
57. |
Мариямны джашы (Гъыйса) да алагъа юлгюге келтирилсе, (Мухаммад), сени халкъынг аны къабыл этмей тиреледи. |
58. |
Сора ала: “Бизни аллахларыбызмы игиди, огъесе олму игиди?”, – дейдиле. Ала ол юлгюню сеннге, къуру даулашыр ючюн келтиредиле. Огъай, ала, къуру демлешиучю къауумдула. |
59. |
Ол а (Гъыйса) Биз анга насыб берген, Бану Исраиллеге да юлгю этген, къулубузду. |
60. |
Биз сюйсек, джер юсюне ие болурлай, сизден (адамладан) мёлекле къураргъа да келир эди къолубуздан. |
61. |
Ишексиз, аны (Гъыйсаны дуниягъа) келлиги къыямат кюнню белгисиди, ол себебден анга чыртда ишеклик келтирмей мени ызымдан келигиз. Тюз джол – ма буду. |
62. |
Ол джолдан шайтан сизни тыйыб къоймасын (сакъ болугъуз), ишексиз, ол сизни джауугъузду. |
63. |
Гъыйса ачыкъ далилле бла келген заманда алагъа: “Ол сиз тартышыб тургъан затланы бир бёлегин ачыкълар ючюн, мен сизге хикмат келтирдим, Аллахдан къоркъугъуз, меннге да бой салыгъыз. |
64. |
Ишексиз, Аллах мени да, сизни да джаратхан Иебизди, энди сиз къуру Анга къуллукъ этигиз, ма бу тюз джолду”, – деген эди. |
65. |
Алай а халкъланы аралары тартыш болду. Ол бойсунмагъан къауумгъа, къыямат кюнню термилтген азабындан, къыйынлыкъ келир. |
66. |
Сора ала нени сакълайдыла? Бир сезимлери да болмай, билмей тургъанлайларына алагъа келлик къыямат кюннюмю сакълайдыла сора? |
67. |
Ол кюн а къуру Аллахдан къоркъгъанладан къалгъанла, джандан джаннга тенгле да бир – бири бла даулашыб джау болурла. |
68. |
Аллах алагъа: “Эй Мени къулларым! Бюгюн сизге не къоркъуу, не мыдахлыкъ джокъду. |
69. |
Бизни аятларыбызгъа да ийнаныб, Аллахха да берилиб болгъанла, |
70. |
кесигиз да, юй бийчелеригиз да джаннетге къууанчлы киригиз! |
71. |
Алтын аякъла, стаканла бла (джумушчула) аланы тёгереклерине айланырла. Сизге мында, джюреклеригиз нени сюйсе, кёзюгюз да неге къараса, ол табылыр. Кесигиз да анда ёмюрлюкге турурсуз. |
72. |
Ма бу сиз ие болгъан джаннет, (дунияда) этген ишлеригиз ючюндю. |
73. |
Сизге анда ашарлай тюрлю – тюрлю кёгетле бардыла. |
74. |
Ишексиз, гюнахлыла уа ёмюрге джаханим азабха тюшерле. |
75. |
Алагъа анда бир дженгиллик болмаз, ала (къутулуудан) да тюнгюлюрле. |
76. |
Алагъа Биз артыкълыкъ этиб болмадыкъ, алай а ала кеслери кеслерине артыкълыкъ эте болдула. |
77. |
Ала джаханимде: “Эй сакълауул мёлек (Малик)! Сени Раббинг бизни ишибизни бир тындырсын (ёлтюрсюн)”, – дерле. Ол да алагъа: “Огъай, сиз анда турлукъсуз”, – дер. |
78. |
Аллах алагъа: “Биз сизге хакъны берген эдик, сизни уа кёбюгюз аны эрши кёрдю. |
79. |
Сора ала (Мухаммадха къаршчы) оноуламы бегитедиле? Ишексиз, Биз да этебиз алагъа оноула. |
80. |
Огъесе, Биз аланы ичлеринде бастыргъанларын да, къуш – муш ушакъларын да эшитмейбиз деб, алай оюмму этедиле? Огъай, аланы юслеринде Бизни джазыучу мёлеклерибиз (аланы нелерин да) джазыб турадыла. |
81. |
Сен алагъа: “Аллахны джашы болгъан болса, эм биринчи анга мен къуллукъ этер эдим”, – де. |
82. |
Ала анга берген сыфатладан кёкле бла джерни Раббиси, гъаршны да Иеси – тазады. |
83. |
Энди, ала ол сёз берилген кюннге джолукъгъунчу дери, сен аланы къойда олтур, сандыракъгъа батыб ала ойнай турсунла. |
84. |
Ол аллай Аллахды, кёкледе да Аллах, джерде да Аллах. Ол акъыл Иесиди, нени да биледи. |
85. |
Ол аллай (Аллахды) кёклени, джерни да, аланы арасында болгъан затны да оноулары Аны эркинлигинде болгъан, къыямат кюнню (къачан) келлигини билими да аны къолунда болгъан, сиз барынг да Анга къайытырыкъ |
86. |
Аллахдан ёзге, къуру хакъны ангылаб анга шагъатлыкъ этгенле болмаса, ол ала табыннган затланы шафагъат этер къарыулары джокъду. |
87. |
Сен алагъа: “Сизни ким джаратды”, – деб сорсанг. “Аллах джаратды”, – демей къоймазла. Сора ала ётюрюклеге уа къалай алданадыла. |
88. |
(Мухаммад): “Я Рабби! Ишексиз, ма была ийнанмазлыкъ халкъдыла”, – дей болду. |
89. |
Энди сен алагъа: “Тынчлыкъ сизге”, – де да, къой да олтур аланы, сора ала артда ангыларла. |