| 1. | როცა დადგება თავზარდამცემი მოსახდენელი |
| 2. | ვერავინ იქნება მისი დადგომის ცრუდ შემრაცხავი, |
| 3. | დამამცირებელი, ამამაღლებელი. |
| 4. | როცა შეირყევა ქვეყანა ძლიერი შერყევით, |
| 5. | და დანაწევრდება მთები პატარა ნამსხვრევებად, |
| 6. | მაშინ იქცევა ნამცეცებად გაფანტულად, |
| 7. | და თქვენც იქნებით გაყოფილი სამ წყვილ ჯგუფად. |
| 8. | აჰა, მარჯვენა მხარის ხალხი, მაგრამ რა მარჯვენა მხარის ხალხი?! |
| 9. | და მარცხენა მხარის ხალხი, მაგრამ რა მარცხენა მხარის ხალხი?! |
| 10. | და პირველწარმატებულნი. პირველწარმატებულნი – |
| 11. | სწორედ ეგენი არიან დაახლოებულნი, |
| 12. | ნეტარების ბაღებში, |
| 13. | თემნი უპირველესნი |
| 14. | და ცოტაც – ბოლოთაგანი |
| 15. | ძვირფასი თვლებით შემკულ სარეცლებზე. |
| 16. | წამოწოლილნი ერთურთის პირისპირ, |
| 17. | და გარს ეხვევიან ჭაბუკნი მარადნი |
| 18. | თასებით, თუნგებით და ფიალებით, (სავსე) მუდმივად მომდინარე წყაროებიდან. |
| 19. | რომლისგანაც არც თავი ასტკივდებათ და არც გონება აერევათ; |
| 20. | და ყველა სახეობის ხილი, რასაც ინებებენ |
| 21. | და ხორცი ყველა სახეობის ფრინველთა, რომელსაც ისურვებენ. |
| 22. | და ქათქათები, დიდთვალება ქალწულნი |
| 23. | ხელუხლებელი მარგალიტის დარნი. |
| 24. | საზღაურად იმისა, რასაც ისინი იქმდნენ! |
| 25. | იქ ფუჭსიტყვაობას არ გაიგონებენ და არ იქნება ცოდვის ჩადენა, |
| 26. | მხოლოდ ერთი სიტყვა – „მშვიდობა“! „მშვიდობა!“ |
| 27. | და მარჯვენა მხარის ხალხი, მაგრამ რა მარჯვენა მხარის ხალხი?! |
| 28. | და ბლის ხეები უეკლო. |
| 29. | და ბანანის ხე, დახუნძლული ნაყოფით. |
| 30. | და ჩეროები განფენილი, |
| 31. | და წყლები მორაკრაკე, |
| 32. | და ყველანაირი ხილი აუარებელი. |
| 33. | არც გამოილევა და არც აიკრძალება. |
| 34. | სარეცელნი ამაღლებულნი. |
| 35. | უეჭველად, ჩვენ გავაჩინეთ ისინი ახალთახალი გაჩენით |
| 36. | ამრიგად, დავადგინეთ ისინი ქალწულებად, |
| 37. | მეუღლეთა მიჯნურად, თანატოლებად |
| 38. | მემარჯვენე ხალხთათვის. |
| 39. | თემნი უპირველესნი |
| 40. | და თემნი ბოლონდელნი. |
| 41. | და მარცხენა მხარის ხალხი, მაგრამ რა მარცხენა მხარის ხალხი?! |
| 42. | ცეცხლში, რომელიც ძვალსა და რბილში გაუჯდებათ და წყალი მდუღარე. |
| 43. | და ჩრდილნი შავი ბოლისგან, |
| 44. | რომელიც არც გრილია და არც სასიამოვნო. |
| 45. | უეჭველად, ეგენი იყვნენ უწინ ფუფუნებით განებივრებულნი. |
| 46. | და შეგნებულად იჟინებდნენ დიდი ცოდვების ჩადენას. |
| 47. | და ამბობდნენ: „ნუთუ როცა მოვკვდებით და გარდავიქცევით მიწად და ძვლად, ნამდვილად უნდა აღვსდგეთ? |
| 48. | ან ჩვენი წინაპრები?“ |
| 49. | უთხარი: უეჭველად, პირველნიც და ბოლონდელნიც, |
| 50. | შეკრებილნი იქნებით განსაზღვრულ ადგილას ცნობილ დღეს. |
| 51. | მერე თქვენ, ჰეი, ნამდვილად გზააბნეულნო, ცრუდ შემრაცხველნო! |
| 52. | უთუოდ, მიირთმევთ ზაყუმის ხისგან. |
| 53. | ამგვარად, ამოიქოლავთ მისით მუცლებს. |
| 54. | მერე დააყოლებთ მდუღარეს, |
| 55. | აგრეთვე დალევთ სნეული აქლემებივით, რომლებიც წყურვილს ვერ იკლავენ.“ |
| 56. | ესაა ის, რაც მათთვისაა გამზადებული განკითხვის დღეს. |
| 57. | ჩვენ გაგაჩინეთ თქვენ. კვლავ არ ირწმუნებთ? |
| 58. | რას იტყვით იმაზე, რასაც ანთხევთ? |
| 59. | განა თქვენ აჩენთ მას თუ ჩვენ ვართ გამჩენნი? |
| 60. | ჩვენ დავადგინეთ თქვენს შორის სიკვდილი და არ ვართ ჩვენ უძლურნი |
| 61. | იმის თაობაზე, რომ შევცვალოთ თქვენი ცხედარნი და აღგადგინოთ ისეთებად, როგორიც ვერც კი წარმოგიდგენიათ. |
| 62. | და ვფიცავ, თქვენ უკვე იცით პირველი გაჩენის შესახებ. მაშ, რატომღა არ დაფიქრდებით?! |
| 63. | რაც იტყვით იმაზე, რასაც თესავთ? |
| 64. | განა თქვენ აღმოაცენებთ მას თუ ჩვენ ვართ აღმომცენები? |
| 65. | რომ გვენება, უთუოდ, გადავაქცევდით მას ხმელ ნაყარ-ნუყარად. მაშინ თქვენ დარჩებოდით გაკვირვებულნი: |
| 66. | „უეჭველად, ჩვენ ზარალი განვიცადეთ, |
| 67. | უფრო მეტიც, გავღატაკდით.“ |
| 68. | რას იტყვით წყალზე, რომელსაც სვამთ? |
| 69. | განა თქვენ გარდმოავლინეთ იგი ღრუბლებიდან, თუ ჩვენ ვართ ზეგარდმომვლენი? |
| 70. | რომ გვენება დავადგენდით მას მწარედ. მაშ, კვლავ არ იქნებით მადლიერნი? |
| 71. | რას იტყვით ცეცხლზე, რომელსაც ანთებთ? |
| 72. | განა თქვენ აღმოაცენეთ ხე იგი, თუ ჩვენ ვართ აღმომცენები? |
| 73. | ჩვენ დავადგინეთ იგი შეგონებად და სარგებლად მოგზაურთათვის. |
| 74. | მაშ, ადიდე შენი ღმერთი დიდებული სახელით! |
| 75. | ვფიცავ, ვარსკვლავთა ადგილებს! |
| 76. | და უეჭველად, იგი დიადი ფიცია, ნეტავ იცოდეთ! |
| 77. | უეჭველად, იგი დიდებული ყურანია, |
| 78. | დაცულ წიგნში . |
| 79. | ვერ მიეკარება მას, თვინიერ განწმენდილთა. |
| 80. | ზეგარდმოვლენილია სამყაროთა ღმერთისგან. |
| 81. | ნუთუ არ გჯერათ ამ სიტყვის , თქვენ ხართ ცრუდ შემრაცხავნი |
| 82. | და თქვენ სარჩოს ცრუდ რაცხვით დაიდგენთ? |
| 83. | მაშინ, როცა სული ყელს ებჯინება, |
| 84. | ამდროს თქვენ მხოლოდ უყურებთ. |
| 85. | ჩვენ მასთან უფრო ახლოს ვართ თქვენზე, მაგრამ თქვენ არ გულისხმაჰყოფთ. |
| 86. | მაშ, თუ თქვენ მართლა არ იქნებით აღდგენილნი, |
| 87. | უკუაქციეთ იგი, თუკი ხართ მართალნი? |
| 88. | მაგრამ თუ იქნება დაახლოებულთაგანი, |
| 89. | მაშინ შვება, სარჩო და სამოთხენი ნეტარების . |
| 90. | და თუ იგი მემარჯვენე ხალხთაგანია, |
| 91. | დაე, „სალამი შენდა, მემარჯვენე ხალხთაგან!“ |
| 92. | და თუ იგი ცრუდ შემრახცველთაგანი, გზა აცდენილთაგანია, |
| 93. | მაშინ მდუღარე წყლით გამასპინძლება |
| 94. | და შენთებაა ჯოჯოხეთში! |
| 95. | უეჭველად, ეს ცხადი ჭეშმარიტებაა! |
| 96. | მაშ, ადიდე შენი ღმერთი დიდებული სახელით! |
