1. |
ვფიცავ, (სინას) მთას! |
2. |
და წიგნს, სტრიქონ-სტრიქონ დაწერილს |
3. |
გაშლილ სიფრიფანა ტყავზე! |
4. |
ვფიცავ, სახლს კეთილმოწყობილს! |
5. |
და კამარას ამაღლებულს! |
6. |
და ზღვას აბობოქრებულს! |
7. |
უეჭველად, სასჯელი შენი ღმერთისა დადგება, |
8. |
მაშინ მას ვეღარავინ შეაკავებს. |
9. |
იმ დღეს შეირყევა ზეცა დიდი რხევით, |
10. |
და ამოძრავდება მთები დიდი სიჩქარით. |
11. |
ვაი, იმათ მდგომარეობას, ვინც ის დღე ცრუდ შერაცხა! |
12. |
რომელნიც ლაყბობით ერთობიან. |
13. |
იმ დღეს წათრევენ და ჯოჯოხეთის ცეცხლში იქნებიან მოსროლილნი. |
14. |
ესაა ცეცხლი, რომელსაც თქვენ ცრუდ რაცხავდით! |
15. |
ნეტა ეს ერთგვარი ჯადოქრობაა, თუ თქვენ არ გულისხმაჰყოფთ? |
16. |
შეენთეთ მასში! მოითმენთ თუ არ მოითმენთ, სულერთია თქვენთვის. მხოლოდ დაისჯებით იმისთვის, რასაც სჩადიოდით. |
17. |
ღვთისმოშიშნი კი, უეჭველად, სამოთხის ბაღებში და ნეტარებაში. |
18. |
დამტკბარნი იმით, რაც უბოძა თავიანთმა ღმერთმა, რამეთუ დაიფარა ისინი ღმერთმა ჯოჯოხეთის სასჯელისგან. |
19. |
ჭამეთ და სვით შერგებულად, ჯილდოდ თქვენი ღვაწლისთვის. |
20. |
წამოწოლილნი სავარძლებზე, ჩამწკრივებულად და დავაწყვილეთ ისინი ქათქათებთან, დიდთვალებიანებთან. |
21. |
რომელთაც ირწმუნეს და გაჰყვნენ მათ შთამომავლობა რწმენით, მივუერთეთ მათაც შთამომავლობა მათი და არაფერს დავუკარგავთ ღვაწლთაგან. ყოველი ადამიანი მძევალია იმისა, რაც მოიხვეჭა. |
22. |
და დავასაჩუქრეთ ისინი იმ ხილით და ხორცით, რასაც ისურვებენ. |
23. |
იქ მოატარებენ ერთმანეთში ფიალებს. არც ფუჭსიტყვაობა იქნება იქ და არც ცოდვის ჩადენა. |
24. |
და გარს ეხვევიან ჭაბუკნი, ხელუხლებელი მარგალიტის დარნი. |
25. |
და შეუბრუნდებიან ერთმანეთს კითხვით. |
26. |
თქვეს: „უეჭველად, ჩვენ უწინ ვიყავით შეშინებულნი, ოჯახის გარემოცვაში. |
27. |
ალლაჰმა წყალობა მოიღო ჩვენზე და დაგვიფარა ჯოჯოხეთის მწველი სასჯელისგან. |
28. |
უეჭველად, ჩვენ მანამდე შევღაღადებდით მას, რამეთუ მხოლოდ იგია სიკეთის მომნიჭებელი და მწყალობელი. |
29. |
მაშ, შეაგონე! რამეთუ შენ, შენი ღმერთის წყალობით არც მისანი ხარ და არც შეშლილი. |
30. |
ან ამბობენ: „პოეტია! და ჩვენ ველოდებით მისი აღსასრულის დადგომას“. |
31. |
უთხარი: „დაელოდეთ და უეჭველად, მეც თქვენთან ერთად დაველოდები!“ |
32. |
ნუთუ გონება კარნახობს მათ ამას თუ ზღვარგადასული ხალხი არიან? |
33. |
ან ამბობენ: „მან შეთხზა იგი!“ არა, ისინი არ ირწმუნებენ! |
34. |
მაშ, მოიტანონ მისი მსგავსი სიტყვა, თუ არიან მართალნი. |
35. |
თუ გაჩნდნენ გამჩენის გარეშე? ან იქნებ თავად არიან გამჩენები? |
36. |
ან იქნებ მათ გააჩინეს ცანი და ქვეყანა? არა, მათ ნამდვილად არ სჯერათ! |
37. |
ნუთუ მათთანაა შენი ღმერთის საუნჯენი? ან იქნებ თავად არიან ხელმწიფენი? |
38. |
ან იქნებ მათთვისაა განკუთვნილი კიბე, რომლის საშუალებითაც ისმენენ? მაშ, მოიტანოს მათგან მსმენელმა ცხადი მტკიცებანი. |
39. |
ნუთუ მას ასულები და თქვენ კი – ძენი? |
40. |
ნუთუ სთხოვ შენ მათ საზღაურს? ამიტომაც ისინი ვალით დამძიმებულნი არიან? |
41. |
ან იქნებ უხილავი მათ წიაღშია და ისინი იწერენ? |
42. |
ნუთუ სურთ ზიანის მიყენება? მაგრამ რომელთაც უარყვეს, სწორედ ეგენი აღმოჩნდებიან დაზარალებულნი. |
43. |
ნუთუ მათ ჰყავთ სხვა ღვთაება, ალლაჰის გარდა? დიდება მას! შორსაა იმისგან, რასაც მოზიარედ უდგენენ! |
44. |
და თუ დაინახავენ ერთ ნაფლეთს ციდან ვარდნილს, იტყვიან: „ღრუბლებია თავშეყრილი.“ |
45. |
მაშ, თავი ანებე მათ, ვიდრე არ ეწევათ ის თავიანთი დღე, რომელშიაც ჩაკვდებიან. |
46. |
იმ დღეს მათი თავიანთი ხრიკები ვერას არგებთ და არც იქნება შეწევნა მათი. |
47. |
და უეჭველად, იმათთვის, რომელთაც უსამართლობა ჩაიდინეს, სხვა სასჯელიცაა, გარდა ამისა. მაგრამ მათგან უმრავლესმა არ უწყის ეს. |
48. |
და მოითმინე მსჯავრი შენი ღმერთისა. შენ ხომ ჩვენი მფარველობის ქვეშ ხარ. და ქებით განადიდე შენი ღმერთი ყოველი წამოდგომისას. |
49. |
და ადიდე იგი ღამის ერთ ნაწილში და ვარსკვლავების გამკრთალებისას! |