1. |
ХIай иман диллинарш! Хьалха ма гIерта Далла а‚ Цуьнан элчана а‚ Делах кхера! Баккъалла а, Дела хозуш верг а ву‚ хууш верг а ву. |
2. |
ХIай иман диллинарш! Шайн аьзнаш ай ма де пайхамаран аьзнал сов‚ чIогIа а ма ала цуьнга дош шун цхьаболчьара вовшашка чIогIа аларх тера шун Iамалш ца яйа шуна хаа ца луш. |
3. |
Баккъалла а, шайн аьзнаш гIелдеш берш Делан Элча волчохь – уьш бу Дала шайн дегнаш зина берш /Делах/ кхерарна. Царна гечдар а ду‚ сийлахь- йоккха ял а ю. |
4. |
Баккъалла а, и хьоьга кхойкхуш берш цIенойн чоьнийн дехьахьара – уьш дукхох берш ца кхеташ бу. |
5. |
Цара собар дахьара хьа шайна тIе араваллалц царна дика хир ма дара. Дела гечдийриг а ву‚ къинхетаме верг а ву. |
6. |
ХIай иман диллинарш! Шуьга цхьа песакъ стаг веъча цхьа хабар дахьаш‚ аш билгалдаккхалаш /цо деънарг/ аш ца хууш цхьана нахана зен ца дан – тIаккха шу шаьш динчунна тIехь дохкодевла хир ду. |
7. |
Шуна хаалаш шуна юкъахь Делан элча вуйла. Дукхах долчу гIуллакхна тIехь шуна тIехьахIуттуш и валхьара – шуна шайна хала хир дара. Делахь а‚ Дала дезийтана шуна иман‚ Цо и хаздина шун дегнашкахь‚ ца дезийтина шуна керстаналла а‚ песакхалла а‚ Iесалла а. Изаш – уьш бу нис боьдурш. |
8. |
Делера дозаллица‚ ниIматаца а. И Дела хууш верг а ву‚ хьукаме верг а ву. |
9. |
Муъма нахах ши тоба летача‚ царна юккъехь маслахьт де. Цу шиннах цхьаъ вукханах летачах ца сацахь – тIом бе /аша массара/ оцу летачуьнца и Делан омрана /и ШарIана/ тIеялц. Иза тIеягIахь /Делан омрана/‚ – маслахьт де цу шиннан юккъехь нийсонца. Аша нийсо елаш. Баккъалла а, Далла беза нийсо еш берш. |
10. |
Баккъалла а, муъма нах – вежарий бу. Маслахьт де шайн шина /довдечу/ вешин юккъехь. Делах кхера‚ шух къинхетам бан мегара. |
11. |
ХIай иман диллинарш! Цхьа нах кхечу нахах ца бешаш ма хуьлийла‚ уьш царел дика хила мега‚ зударий а ма хуьлийла кхечу зударех ца бешаш‚ уьш царел дика хила мега‚ вовшийн кхачамбацарш ма леха‚ вовшашна /ца еза/ цIерш а ма техка. Вон цIе ю песакхалла иманал тIаьхьа. /Цул тIаьхьа/ тоба ца динарш – уьш зуламхой бу. |
12. |
ХIай иман диллинарш! Гена довла мотталучу хIуманех дукхох долчух. Цхьа долу мотталу хIуманаш къа ду. Вовшашна ма теIа /къайлах хIума хаа гIерташ/‚ шух цхьаберш вакхарех тIехьашха ма ле‚ шух цхьаннена дезий шен вешин жижиг даа и велча? – шуна иза ца дийзи. Делах кхера. Баккъалла а, Дела тоба къобалдийриг ву‚ къинхетаме а ву. |
13. |
ХIай нах! Баккъалла а, Оха шу кхоьллина стагах а‚ зудчух а‚ хилийтина шух халкъаш а‚ тайпанаш а шу вовшашна довзийтан. Баккъалла а, шух уггар сийлахьверг Далла гергахь – шух уггар /Делах/ кхоьрушверг ву-кх. Баккъалла а, Дела /шу/ девзаш ву‚ сов дика хууш ву. |
14. |
Iарбаша элира: “Иман диллина Оха”. Ахьа ала: “Иман ца диллина аш‚ делахь а аш ала: “МуьтIахь хили тхо”. ХIинца а иман чу ца дахна шун дегнашна. Шу Далла а‚ Цуьнан элчана а муьтIахь хилахь – шун Iамалех хIумма эшор ма яц Цо. Баккъалла а, Дела тIеттIа гечдеш верг ву, къинхетаме верг ву. |
15. |
Баккъалла а, муъма нах бу шаьш иман диллинарш Деле а‚ Цуьнан элчане а‚ тIаккха шеко ца еш‚ шайн бахамца а‚ шайн синошца а Делан новкъахь къахьегнарш (джихIад деш). Уьш бу бакълуьйш берш. |
16. |
Ахьа ала: “Аша Iамадо Далла шайн дин? Дела хууш ма ву стигланашкахь дерг а‚ лаьттахь дерг а. Дела массо хIума хууш верг ву”. |
17. |
Хьуна баккхибедаш бу уьш шаьш бусулба хила. Ахьа ала: “Суна даккхи ма деда шаьш бусулба дин эцаран”. ХIаъ‚ Дела къинхетам беш ву шух – шу нисдина иманна тIе‚ шу бакълуьйш хиллехь. |
18. |
Баккъалла а, Далла хаьа стигланийн а‚ лаьттан а къайлахь дерг. Дела гуш дерг ма ву аш дийриг. |