1. |
Хьа-мим. |
2. |
Жайна охьадоссор /ду хIара/ Веза волчу‚ хьукаме волчу Делера. |
3. |
Баккъалла а, стигланашкахь а‚ лаьттахь а делилш ма ду муъма нахана. |
4. |
Шу кхолларехь а‚ /массо а лаьттахула/ даьржинчу дийнатехь а делилш ду ша тешаш долчу къамана. |
5. |
Буьйса-де хийцадаларехь а‚ Дала стиглара охьадоссинчу рицIкъехь а (догIехь а), Ша цуьнца деллачул тIаьхьа латта дендина долчу‚ мох хьийзарехь а делилш ма ду хьекъале долчу къамана. |
6. |
ХIорш Делан аяташ ду‚ Оха доьшу уьш хьуна бакъдолчуьнца. Муьлхачу хабарех Делал а‚ Цуьнан аятил тIаьхьа теша уьш? |
7. |
/Боккха/ бала бу массо къа деш /чIогIа/ харцлуьйш волчунна. |
8. |
Ша ладугIуш волчу шена тIехь доьшуш долчу Делан аяташка тIаккха чIагIлуш волчу /шен къиношкахь/ кураваьлла шена уьш ца хозучух /ца хезаш санна/ – ахьа кхаъ баккха цуна лазош долчу Iазапаца. |
9. |
Шена Тхан аятех цхьа хIума хиъча – иза схьалоцу цо белам бой. Уьш шайна сийсаза долу Iазап хир дерш бу. |
10. |
Церан хьалхахь жоьжахати ю. Цара гулдинчо а‚ Дела воцу цара лаьцначу доладийраша а хIумма а кIелхьара доккхур дац царех. Царна деза-доккха Iазап ду. |
11. |
ХIара бу нийса некъ. Шайн Кхиош-кхобучун аяташ керста динарш – /уьш бу/ шайна лазош долчух уггар чIогIа Iазап хир дерш. |
12. |
Дела ву Ша хIоьрд шуна муьтIахь бинарг цу чухула кема лелийтан а Шен омраца‚ шуьга лехийта Цуьнан дозаллах /хIоьрдан ниIматаш – чIера‚ маржанаш…/‚ шу хир дацара-те баркалла олуш. |
13. |
Шуна муьтIахь дина Цо стигланашкахь мел дерг а‚ лаьттахь мел дерг а – массо а Шегара. Баккъалла а, цу чохь делилш ма ду ойла еш долчу къамана. |
14. |
Ахьа ала иман диллинчаьрга гечдойла цара Делан деношка дог дохушбоцучаьрна Цуьнга бекхам байтархьама нахана шаьш /дуьненахь/ гулдеш хиллачуьнца. |
15. |
Милла велахь дика дина – цуна шена ду иза‚ милла велахь вон дина – цуна шена дуьхьал ду иза а. ТIаккха шайн Кхиош-кхобучун тIе дIадерзор ду шу. |
16. |
Оха делира Исраилан кIенташка жайна а‚ хьукам а‚ пайхамаралла а‚ рицIкъ делира царна цIена долчарех‚ Оха базбийра уьш Iаламел. |
17. |
Оха елира царна /динан/ гIуллакхан билгалонаш. Церан хилпало ма ца хилира шайга Iилма деъначул тIаьхьа бен вовшийн юкъахь хьагI хиларна. Баккъалла а, хьан Кхиош-кхобучо кхиэл йийр ю царна юккъехь къемат дийнахь шайн шеца хилпало хиллачохь. |
18. |
ТIаккха хьо /я Мухьаммад/ хилийтина Оха /динан/ гIуллакхан бакъонехь – цуьнан тIаьхьахIотта‚ ца хууш болчаьрийн дезаршна тIаьхьа ма хIотта. |
19. |
Баккъалла а, цара Делера хIумма а кIелхьара доккхур дац хьуна. Баккъалла а, зуламхой церан цхьаберш вакхарийн доладийраш бу хьуна. Дела доладийриг ву /Делах/ кхоьруш болчаьрийн. |
20. |
ХIара – билгалонаш ю /бIаьрг беллош/ нахана‚ нийса некъ а бу‚ къинхетам а бу тешаш долчу къамана. |
21. |
Къинош летийначаьрна метта-те Оха шаьш иман диллнчаьрца‚ дика Iамалш йиначаьрца цхьанисса хуьлуьйтур бу – шайн денбалар а‚ балар а? Ма вон ду-кх цара деш долу хьукам. |
22. |
Дала кхоьллина стигланаш а‚ латта а бакъдолчуьнца‚ хIора сина ша гулдинчуьнца бекхам хилийтархьама а‚ царна /цхьанне ца динарг бахьанехь/ зулам дийр дац. |
23. |
Хьуна го-й и шен шена дезарг шен дела лаьцнарг? Дала тила витина иза шен хаарца‚ Цо мухIар тоьхна цуьнан хазарна а‚ дагна а тIе‚ цуьнан бIаьрсана тIе кирхьа диллина Цо. ТIаккха иза хьан нисвийр ву Делал тIаьхьа? Аш ойла ца йо? |
24. |
Цара элира: “ХIара вайн дуьненан дахар бен кхин дахар дац. Ло /вайн цхьаберш/‚ дуьнена бовла /цхьаберш/‚ вай хIаллак дийр ма дац замано бен”. Церан ма дац цуьнца цхьа а Iилма. Уьш /беккъа иштта/ моьттуш бу. |
25. |
Царна тIехь Тхан билгала долу аяташ дешча‚ церан делил ма ца хилира цара алар бен: “Схьабалабе тхан дай шу бакълуйш хиллехь”. |
26. |
Ахьа ала: “Дала дендийр ду шу‚ тIаккха Цо долуьйтур ду шу‚ тIаккха гулдийр ду шу къематдийне‚ шена чохь шеко йоцчу”‚ делахь а дукхох болчу нахана ца хаьа-кх. |
27. |
Делан ду-кх стигланийн а‚ лаьттан а паччахьалла. Сахьт хIоттинчу дийнахь – оцу дийнахь оьшур ма бу харцберш. |
28. |
Хьуна гур ма ду массо уммат гора дахна. ХIора уммат кхойкхур ма ду шен жайна тIе – тахана шуна бекхам бийр ма бу аша деш хиллачуьнца. |
29. |
ХIара ду Тхан жайна тешалла дийр долуш шуна бакъдолчуьнца. Баккъалла а, Тхо хилира дIаяздеш аша деш хилларг. |
30. |
Иман диллинарш а‚ дика Iамал йинарш а – уьш бухкур бу церан Кхиош-кхобучо Шен къинхетамна чу. Иза билгала болу толам бу-кх! |
31. |
Ткъа ца тешаш хилларш /цаьрга эр ду/: “Сан аяташ ца хилира шуна тIехь доьшуш? Аша куралла ма йира – тIаккха шу къинош ден къам хилира”. |
32. |
/Шуьга/ элча: “Баккъалла а, Делан ваIда бакъ ю‚ сахьт /хIуттур ду/‚ шеко яц цу чохь”‚ аша элира: “Ца хаьа тхуна‚ сахьт хIуттур ду а‚ вайна хуург-м цхьа моттар бен дац‚ баккъалла а, тешаш ма дац тхо”. |
33. |
Гучаделира царна шаьш дина хилла вонаш‚ хьакхаделира царех уьш шех ца бешаш хилларг. |
34. |
Элира /цаьрга/: “Тахана Тхуна шу дицделла‚ шуна хIокху денца цхьаьнакхетар дицдаларх терра. Шун чугIойла /жоьжахатин/ цIе ю‚ вац шуна цхьа а гIоьнча”. |
35. |
Иза ду /шуна/ аша Делан аяташ беламе лаьцна хиларна а‚ дуьненан дахаро шу Iехорна а. Тахана уьш арабохур бац цу чуьра‚ цаьрга тоба дар а доьхур дац. |
36. | Далла бу хастам‚ стигланийн Да волчу‚ лаьттан Да волчу‚ Iаламийн Да волчу. |
37. | Цуьнан ду сийлахь-доккхалла стигланашкахь а‚ лаьттахь а‚ Иза ву веза верг а‚ хьукаме верг а. |